Dimapur, June 7 (TYO) : Peren district kübok Heningkunglwa tesem nung NSCN/GPRN-i acha-ayangba rehabilitation centre “Operation Salvage” indang 15 buba foundation day Mongulbarnü amung.
Iba centre ya lanurtem mozü aser yi ajemba talenba nungi salatsütsü aser mapa inyaktsü tangatetba sayutsü nükjidong nung lapokba lir aser tanü sentong nung MIP Kilonser, NSCN/GPRN V. Horam-i tongti tesemdanger ama shilem agi.
Sentong nung o jembidang, Horam-i ashiba agi Nagalim nung Rehabilitation centre tem rongnung Operation Salvation (OS) ya tajungtiba rongnung ka lir aser küm shia tajungba-tajungba küma aoer.
Iba Centre nung alirtemi mapang aoba mazüngtsü saka Tsüngremi asenok nem agüja aliba sempet indang teinyaktsü tonga inyaktsü atema merangtsüla, ta paisa ayongzük.
NSCN sorkari maneni iba centre nem teyari agütsütsü aser kobi melii Board of Directors tentettsü. Iba telok tentetba sülen rehab centre nung multi purpose conference hall, water supply aser tanga nüngdakbatem atema inyaktsü, ta Horam-isa shisem.
Paisa, centre nem NSCN/GPRN lennirtemi agütsüba TATA Xenon Pick up Mobile truck gari indang sapi agütsü.
Sentong nung Kilonser aser Centre tenzüker, David Lungalang-ia o jembidang, “tetenzük nungbo kanga timtem ajuru saka NSCN/GPRN aser anemeta aliba yimtsüngtemi yariba ajanga item timtemji koktetogo” ta ashi.
Paisa, NGOs aser sorkar dang mozü aser yi achiajemba khuret agientsü atema iba amala centre lapoktsü ayongzük.
Sentong nung mendenji Counsellor, Operation Salvage, T Meren Jamir liasü, Director, Operation Salvage, Atoho V Yeptho-i tesentepertem pela agi aser centre nung alir Temjenyanger aser Avibou nati taküm kuli lemsatep.
Iba rehab centre nung nisung 50 shi lir aser parnok rongnung nisung 17 bo agency balala nung mapa inyakertem lir.
You must be logged in to post a comment Login