Opium ajanga takoksa agütsüba sangdongtsüla: JP Rajkhowa

Itanagar, February 18 (Agencies): Brihostibarnü Arunachal Pradesh Angh, J.P. Rajkhowa-i national award angusang, film yanglur Jahnu Barua dang, “Opium ajanga takoksa agütsüba sangdongtsüla. State nüburtem ajangzüktsü mechi nung nai iba dak sentakba otsü ka zülutsüla,” ta ashi. Anghisa, State sobaliba aser yimsüyimpong balala tsütsü film yanglutsüla, ta ashi.
“Arunachal Pradesh nung sobaliba aser yimsüyimpong balala meimbanga lir. Kin ka danga yimsü putepa mali. Kin ajak sobaliba aser tamangba yimsü balala lir anungji state nung otsü balala aika lir. Iba denji külemi pei sobaliba dak apet anogo shia benjungbentsü balala mungteper,” ta Rajkhowa-i ashi.
Angh-i, opium lu ayimba indang nüburtem dang temai adoka metetdaktsütsüla, ta Barua dang shisem.
Rajkhowa-i Barua dang, iba project nung nüngdakba ajak nung nüngita yaritsüa nangzük.
Pai Barua dang Arunachal Pradesh aser Assam nung sempet tajung alirtem nem film nung shilem agidakjang, ta ashi.
Rajkhowa-i ashiba agi, pai Barua-i yangluba film ka danga mereprangi mali.
Anghi, sentong balala ayonga sempet alirtem nem training balala ajanga tetuyuba tajung agüjang, ta ashi.
“Institution aser sorkar teyari metenaka Arunachal Pradesh nung aliba lanurtem dak acting, kententsü aser music tsütsü sempet tajung aketer aika lir. Anungji training tera dang agütsü nungbo cinematography nung parnok alakteta tajung akümtsü,” ta Angh-i ashi.
Angh kinungtsü, Rita Rajkhowa-ia, lokti tebilemtsü aser tetsür tashi tsütsü film yanglutsüla, ta ashi.
Barua-i, Arunachal Pradesh nung cinematography tsütsü sempet aliba kaktettsü merangtsü, ta ashi.
“Otsü aika ashitsü lir. State nung aliba lanurtemi ibaji angateta alima nem film tajung ajanga osang sangoktsütsüla. Ni nenok den teti yariteptsü mulunga lir,” ta paisa ashi.