Opp-i PM aitsüba ajanga India mezüngmeshir: BJP

New Delhi, November 13 (Agencies): Yashi UK nung Ato kilonser Narendra Modi-i jembiba o opposition party temi aitsüba dak sentakba nung Hokolbar nü Bharatiya Janata Party (BJP)-i, opposition party temi Ato kilonser aitsüba ajanga linük mezüngmeshir, ta ashi.
“India aser UK naprongla nung Ato kilonseri jangja jangja dang, India nung amangba lokti tsüngda akhümtsübutep maliba atema tesem mali ta jembiogo. Iba atemaji onoki ajak den longjemer inyaktsü. Linük nung akhümtsbutep mali ta onük amer tashi kari ozü sorkar tenüng menüktsütsü meranger. Ato kilonser Modi Gurajat Chief minister inyakba mapang nunga tashi kari ibaji merangogo,” ta BJP otongdar, Shahnawaz Hussain-osangbenertem dang ashi.
“Tang parnoki linük mezüngmeshir. Ato Kilonser arishitsü merangdang parnoki linük mezüngmeshi tenzüker ta parnoki tanglakabo apudaka malutsüla,” ta paisa ashi.
Hussain-isa, rara tatalokba ka-ana dak alaka linük nung tesünep lir, ta ashi.
“Alimai India meteta lir, kechiyong yangi tamangba lokti aika tesünep nung alir. Tatalokba ka-ana ajanga parnoki linük mezüngmeshi masütsüla,” ta pai ashi.
Ato kilonser Modi-i United Kingdom nung jembiba o dak sentakba nung Congress party-i, ibaji ajanga pa ‘temeli ana aketba aser anemsü sayur’ ta aija liasü.
Congress lenir Anand Sharma-i, Ato kilonser Modi-i sangdong tai magütsüi India nung tamangba lokti temeyoktep tesünep nung litettsüsa inyaktsüla, ta jembia liasü.
Yashi United Kingdom nung osangbenertemi, India nung tamangba lokti tsüngda tesünep maliba dak sentakba nung asüngdangba ka langzüdang Modi-i, India ya Gandhi aser Buddha nunger aliba linük, aser akhümtsübutep maliba aser tesempatepji kecha jenjang nunga magizüktetstü, ta jembia liasü.