Opposition aliba constituency 7 nung vote teimba angu: NDPP

Dimapur, Aami (June) 2 (TYO): Lok Sabha By-Election nung Nagaland nung alirtemi Nationalist Democratic Progressive Party (NDPP)-i aniba PDA sorkar dak temulung lema PDA consensus candidate Tokheho Yepthomi nem takok ngudaktsüba atema kanga pelar, ta NDPP-i metetdaktsü.
Election Commission of India, State Election Department, Police aser Administration temi by-election tiptema agiba atema parnok nem tenüngsang agütsü. Maneni onoki civil society tem, kin hogotem, arogotem aser NGO tem dang pelaba shisemer, ta NDPP, Media & Communication Committee sangdong ka nung ashi.
NDPP-BJP teloktepi sorkar kümteter ita ana tsüngda nung Opposition temi takok ngua aliba constituency 7 nungi parnok dang nungi vote teimba angu. Constituency temji- 3 Dimapur III A/C, 13 Pughoboto A/C, 20 Meluri A/C, 21 Tuli A/C, 46 Mon Town A/C, 54 Tuensang Sadar II A/C aser 60 Pungro Kiphire A/C lir.
2018 general election nung NDPP-BJP-i votes 4,08,056 (40.51%) angu aser NPF-i menden 58 nung toktepba nung votes 3,89,687 (38.69 %) dang angu. Election nung PDA züngsemtem ajak senteper votes 5,29,255 (54 %) ngutet, ajisüaka Lok Sabha By-Election 2018 nung PDA-i votes 10,18,658 nungi votes 5,94,205 tashi angu aser ibaji 58.33 % lir. Iba ajanga nübortemi Chief Minister Neiphiu Rio lenisüba aser NDPP-i aniba PDA sorkar dak tamang akaba sayur, ta parnokisa ashi.
Opposition party temi nübortem tangatetba aser PDA nem vote agütsüba mezüngmeshi masütsüla. Nagaland nung Congress agienogo aser parnok Nagaland Legislative Assembly nung MLA ka danga mali, anungji parnoki PDA sorkar dak tai tongloktsütsü temeten mali. Congress-i tangar dak tai tongloktsütsü melena nübortem akümtsübutsüla.
PDA-i proxy voting asüba aser booth makdokba ajanga takok angu ta NPF-i metetdaktsüogo saka 26 Aonglenden A/C kübok Kubza yimtsüng nung timtem ajuruba dak alaka election dak sendakba mangatettep ka danga malisü. Kupza nungji NPF pusemertemi polling meinprong aser iba jagi Monupii (May) 28, 2018 nü re-poll asütsüsa aküm. NPF-ia ang polling nung timtem agütsü anungji parnoki tamakok anguba tejashi nung tangar dak tai metongloktsütsüla, ta Media Cell sangdong nungsa shia lir.
PDA consensus candidate nem takok tulu ngudaktsüba atema NDPP-i PDA teloktep nung adenertem- BJP, JD(U), NPP, IND aser party züngsem ajak dang kanga pelar. Iba takok ya nübortem ola adokba lir aser PDA sorkari state nung senso shia atema inyaktsü nangzükshir.
Lok Sabha züngsem akümtsü takok anguba atema NDPP-i Tokheho Yepthomi nem tenüngsang agütsür aser pai Parliament nung Naga nunger atema noktaktsü ta tamang akar. NDPP-i Nagaland renlokdaktsütsü atema inyaktsü aser Naga yimten tebilemtsü tekaraba nung latettsü atema inyakba den asen kidangertem den tesentaktep tajung yur yimjung nung alitsü merangtsü, ta NDPP-isa ashi.