Opposition-i aitsüba sülen Adityanath meyipa ao

New Delh, Monupii (May) 4 (Agencies): Yipru agi par state nung takoksa tulu bentsür aruaka Uttar Pradesh Chief Minister Yogi Adityanath-i Karnataka nungang election nüboyimba sentong nung adener ta opposition temi aitsüba sülen Rogonü (Hokolbar) Adityanath par state-i meyipa ao.
Chief minister taonung Agra tonga arutsü aser asüngnep lendong ajuruba tesemtem semdangtsü, ta Principal Secretary Information Avanish Awasthi-i ashi.
Adityanath-isa Kanpur-i aotsü aser relief maparen inyakba reprangshimtsü, ta Awasthi-isa ashi.
Yangtepnü (Brihotisbar) Karnataka chief minister Siddaramaiah-i Adityanath lutsü.
Par state nung yipru agi takoksa bentsür aruaka pa election agitsü aliba state nung arua amunger, ta Siddaramaiah-i metetdaktsü.
“Nür CM yangi Karnataka nung nüngdaker. Pa yangi mapa atemba sülen yakta meyipa arutsü” ta paisa ashi.
Samajwadi Party tanishir aser taoba UP CM Akhilesh Yadav-ia Adityanath aitsü.
“Adityanath Karnataka nung nüboyimtsü atema ogo anungji party (SP) züngsemtemi takoksa ajururtem den yariteptsü mepishir. State indang khurettem reprangtsü atema UP nungertemi pa shim anungji CM-i nüboyimtsü atema maotsüba liasü” ta Akhilesh-i ashi.
“CM tangsa tang arutsül, Karnataka election nung nüboyimba toktsütsüla. Nübortemi Karnataka nung yimtenren mapa masü saka state indang khuret reprangtsü atema pa shim” ta paisa shisem.
Rasemnü (Bodbar) aonung Uttar Pradesh aser Rajasthan nung yipru aser tzünglu tulu aruba ajanga lendong balala nung nisung 108 tashi asü.
Lendong tamajungtiba atalokbaji Uttar Pradesh nung liasü aser iba state nung nisung 73 asü. UP ketdangsertemi ashiba agi nisung 90 yiru aser kiset shiruru 134 asü.
Adityanath ya Küptoknü (Honibar) anüngdang tashi Karnataka nung nüboyimba sentongtem nung adentsüba sentong liasü.