Opposition-i ballot paper amshitsü atema akhangtsüla: Mamata

Kolkata, June 03 (Agencies): Hombarnü TMC tongti aser West Bengal Chief Minister, Mamata Banerjee-i opposition party ajak dang longjemer election mapang nung ballot paper dang amshitsü atema akhangtsü ajungshi.
Mamata Banerjee-i, EVMs indang tejangja metettsü atema fact-finding committee ka tentettsüla, ta ashi.
State Lok Sabha election nung TMC-i menden aika nung takok mengutetba kuli bushitsü atema tanü party MLA aser Minister tem senden amenba sülen osangbenertem den jembidang Mamata-i, “Asenoki democracy kümzüktsüla. Onoki machines (EVMs) mamshiner saka ballot paper amshitsü atema akhanger. Onoki maparen ka tenzüktsü aser ibaji Bengal nungi ketdangsüa inyaktsü,” ta metetdaktsü.
Laisa, “Ni opposition party 23 prongla dang ka küma longjemer ballot papers amshitsü atema akhangtsü ayonger. US ama linük nunga EVMs nokdangogo,” ta ashi.
Mamata-i, election nung takok angutsü atema BJP-i sen tashi, tashiyim, rejutem, media aser sorkar tashi amshi, ta aitsü.
BJP-i Lok Sabha menden 42 nungi menden 18 nung takok angu, aser ibaji Left Front ajanga lir, ta lai ashi.
Election jakdang Opposition party temi Electronic Voting Machines (EVMs) amshiba anema aiben ola adoka liasü. Election sangdongtsü anogo ishika dang lia Andhra Pradesh nung taoba Chief Minister, Chandrababu Naidu leniba nung opposition party 22-i Election Commission dang VVPATs den EVMs ajak medemdangtsü takhangba agüja liasü, ajisüaka election osang sangdongba sülenbo opposition party shingaia EVMs anema ola madok.