Opposition-i November 8 nü ‘Black Day’ amungtsü

New Delhi, October 24 (Agencies): November 8 nü Opposition züngsemtemi demonetisation tenzüker küm ka ajungba tenüng nung linük ajungalen ‘Black Day’ amungtsü.
Iba osangji Rajya Sabha nung Opposition lennir Ghulam Nabi Azad-i Mongulbarnü metetdaktsü.
Osangbener senden nung Trinamool Congress nungi Derek O’Brien aser temulung masüba JD(U) züngsem Sharad Yadav na liasü.
“November 8 nü sangoktsüba osangji iba aso nung ashikülak mapa tulutiba liasü aser iba jagi onoki Black Day amunger” ta Azad-i ashi.
“Iba ya ashikülak mapa tulutiba liasü aser yimten telok 18-i state shia nung pei akokba yari sorkar telemtetba anema lungkak aittsü telemtetba agiogo. Sorkar policy ka ajanga nübortem okrongdaktsübaji iba ya liasü” ta paisa shisem.
Prime Minister Narendra Modi-i aniba sorkari sen nokdangba ajanga rongsenkettsüng tsütsü tetsükdaktsü ajuruba aser GST tenzükba onüktem jembitsü atema yashi party balala nungi lennirtem adenshia senden ka amen.
Hombar Parliament House nung amenba senden nung coordination committee züngsemtem aden aser parnok rongnung O’Brien, Yadav, D Raja (CPI), Kanimozhi (DMK) aser Satish Chandra Mishra (BSP) nungertem dena liasü.
November 8 nü demonetisation anema November 8 telok 18 tashi lungkak aittsü sentong lir.
Yimten telok shiai pei pei oshi nung iba anogo nem tenüng agüja amungtsü. West Bengal nungi O’Brien-i osangbener dang ashiba agi, par party-i November 8 “Kalo Dibas” ta ser amungtsü aser ibaji Bengali oshi nung tammang anogo lir.
“November 8 nü ashikülak mapa inyakba ya India putiotsü nung teti atema züluoka ayutsü. Onoki iba policy atema tasüngdangba aser tebilemba aika shiogo saka sorkari item asoshi telangzüba magütsütet” ta paisa shisem.