Opposition-i Park Tir menden nungi anentsütsü onük benoker

Seoul, December 03 (Agencies): South Korea’er opposition teloki ozüng alema ochimashi inyakba ken o nung ajemdaker khuret tulu benoka alila, S Korea Tir, Park Geun-hye yimsüsütsü menden nungi anentsütsü onük tanü, Honibar nü benokogo.
S Korea nübur meyirijang jenti tanü agi hopta 6 buba tashi atonga Seoul yimtiba nung adenshia, Park Tir menden nungi anentsü takhangba benoka longkak aitba mapang ka nung opposition teloki Park anema ken oji benoker lir.
S Korea yimsüsür 300 züngsemba legislature nungi yimsüsür 171 tashi par maitsü ajenoka, Park Tir menden nungi anentsütsü onükji benoka liasü aser iba ken o den sentakba vote agitsü mapatong taruba Hokolbar nü National Assembly nung agitsü renema lir.
Seoul madak yimsü asütsü temeten ngua alir yimtenren telok nungi yimsüsür 28 tashi iba onükji agizük nung dang tan benokba onükji mapa küma inyaktsü lir.
Lar linük indang yimsüsütsü tashi melenteptsü maparen nung tetsükdaktsü kecha melidaktsütsüsa tensa bener arutsütetra, lai Tir menden toktsütsü renema aliba olen ka Park-ia tawa metetdaktsüogo saka la Tir menden nungi tashiyim agi atsüngdoktsü maparen paidoktsü nükjidong nung Park-i yimsüsütsü menden toktsütsü renemba osangji sangoktsü ta shia, opposition teloki Park aija lir.
Ano külen, S Korea madak yimsü asütsü temeten ngua alir yimsüsürtemia Park-i taruba 2017 küm April ita Tir menden toktsütsü aser Tir tasen shimtsü election sentong June ita agitsü asoshi onük benokogo.