Opposition-i tanüngba Budget senden nung madentsüa akok

New Delhi, February 10 (Agencies): Yakünü Ato kilonser, Narendra Modi-i taoba Ato kilonser Dr Manmohan Singh aija jembiba nung ajemdaker Congress-i anir opposition-i NDA sorkar dang tejashi sayutsü.
Hokolbarnü osang ka ajanga, Parliament makatettsüa akok, kechiyong Congress party-i tanga opposition party tem ayonger March 9 nungi Ato kilonser anema tanüngba Budget senden nung madentsüa akok, ta metetdaktsü.
Congress densema opposition party aikati, Manmohan Singh aija jembiba atema Modi-i “meyipa reprangshitsüla aser tatok meshitsüla,” ta shiogo.
Rajya Sabha nung Opposition Deputy Lenir, Anand Sharma-i osangbenertem dang, “Ato Kilonser-i tatemsa jembibaji Opposition-i züluoka ayutsü,” ta ashi.
Yashi Congress, TMC, SP, JDU, DMK aser Left party tem senden ka mena sentong yangluogo, aser maneni parnoki senden ka mena telemtetba kar agitsüa akok.
Sharma-isa, Congress-i Rajya Sabha aser Lok Sabha naprong atema kasa sentong ka yanglutsü, ta metetdaktsü.
Bodhbarnü Rajya Sabha senden nung jembidang Modi-i taoba Ato kilonser, Manmohan Singh aija, “Pai (Manmohan) ‘raincoat’ semer tzü chigotsü junga meteta lir, kechiyong par sorkar mapang ochimashi aika liasü, saka pabo ochimashi tarak maket,” ta jembia liasü.
Iba dak sentakba nung yashi election nüboyim sentong ka ka nung Congress lenir, Rahul Gandhi-i, Modi-i jembiba oji linük ajunga mezüngmeshiba lir, ta aitsü. Rahul-isa, “Tamalen inyakertem (Ato kilonser) akhüm metsübui jembiba mezüng Ato kilonserji Modi asütsü,” ta aitsü.