Opposition-i timtem agütsüba ajanga RS senden March 11 tashi thinener

New Delhi, March 06 (Agencies): Hokolbar tashi nung anogo pezü tashi Rajya Sabha senden nung opposition-i Delhi rara dak sendakba onük nung ajemdaker timtem agütsüba ajanga March 11 tashi senden thinenogo, ta ketdangsertem osang ajanga metetdaktsü.
Tawa North-East Delhi nung tamangba lokti ana tsüngda rara adokba ajanga nisung 53 asü aser nisung 200 dak tema yirua liasü.
Hokolbarnü senden tenzüka Rajya Sabha Chairman aser linük tatong Tir, M Venkaiah Naidu-i treasury benches aser Opposition dang Rajya Sabha senden junga agitettsü atema telemtetba tajung ka agiang, ta metetdakja liasü.
Naidu-i, “Ni sorkar aser Opposition züngsem ajak dang senden junga agitettsüsa o lemteper telemtetba tajung ka agitsü mepishir,” ta metetdaktsü.
Ajisüaka popposition-i rongrong adokdaktsüba ajanga March 11 nü anüngdang 11:00 ako tashi senden thinenogo.
Budget tanabuba session tenzükba anogo nungi opposition-i Rajya Sabha aser Lok Sabha naprongla nung tawa Delhi nung rara adokba onük süoka jembitsü takhangba agüja timtem agütsüba ajanga senden junga magiteter.
Brihostibarnüa Rajya Sabha Chairman-i Parliament züngsemtem dang jashia, “Iba ya shishilembaba tesem ka masü” ta shia liasü.
Brihostibarnü Rajya Sabha senden nung MP kari nokdaker sorkar anema yimyim ayima liasü. Parnokisa Delhi nung rara adokba atema o lemteptsü takhangba agütsü. Iba mapang nungji Naidu-i Parliament nung yimyim mayimtsüla, ta ashi. “Yimyim kecha mayimtsüla, kechiyong Parliament ya shishilembaba tesem ka masü,” ta pai ashi.
Brihostibarnü Lok Sabha nunga opposition party balala nungi züngsemtemi timtem agütsüba ajanga senden junga magiteti liasü. Ibayongji Speaker, Om Birla-i Congress MP tenet anentsüogo. Congress MP temji– Gaurav Gogoi, TN Prathapan, Dean Kuriakose, R Unnithan, Manickam Tagore, Benny Behnan aser Gurjeet Singh Aujla nunger lir.
Congress-i Delhi rara onük ya tangsa Parliament nung süoka jembitsüla, ta akhang saka Speaker-i, iba onükji Holi benjung sülen ang jembitsü, ta metetdaktsüogo.