Opposition-i Venezuela lenisang, Maduro anema longkak aiter

Caracas, October 27 (Agencies): Venezuela opposition teloki ayongba sülen Venezuela kübok yimti balala nung nübur meyirijang jenti par Tir, Nicolas Maduro anema longkak aittsü sentong agiba osang jangjaogo.
Par lenisang, Maduro aser pai aniba sorkar dang mepelaba metetdaktsüba den Maduro Tir menden nungi anentsü takhangba benoka, tan longkak aiteremi yimti yimdong süa jaja liasü.
Opposition teloki Maduro Tir menden nungi anentsütsü atema nüburtem nungi vote bendentsü mapatong taoba benok saka iba mapatongji Maduro-i aniba sorkari nokdanga liasü.
Maduro anemer Venezuela nübur meyirijang jenti taoba September ita 1 nü lokti senden ayonga, par mepelaba metetdakja yimti yimdong süa jajaba sülenbo par nüburtemi tan mezüngsüa longkak aittsü sentong kanga sashia agir lir.
Par linük indang rongsenren jenjang mejungi kümdaktsüba ken o nung ajemdaker Venezuela nübur noklang nung shilem 75 shi Maduro Tir menden nungi anendaktsünüa aliba osanga bushitetogo.
Ano külen, par linük tensa mejungi akümbaren melenshitsütsü nükjidong nung opposition yimsüsürtem den angatetteptsü tajungshiba olen ka alima ajunga nung Catholic tamangba yimsü benshir lenisang, Pope Francis-ia Maduro den Vatican nung tan Hombar nü ajurutepdang metetdakja liasü.