Opposition-i Vice-President candidate atema Gopalkrishna Gandhi shim

New Delhi, July 11 (Agencies): Mongulbarnü Opposition-i Vice-President election nung tokteptsü atema taoba West Bengal Angh, Gopalkrishna Gandhi shimogo.
Tanü Opposition telok 18 nungi lennirtem adenshia senden amendang Mahatma Gandhi’er semchirji shimtet. Parliament House nung amenba senden nung Opposition temi Gopalkrishna dak alaka tanga tenüng shinga mebenok ta osang angazüker.
Senden amenba sülen Congress tir Sonia Gandhi-i osangbener dang party ajaki Gopalkrishna Gandhi mulungsoa agizük, ta ashi.
“Party 18-i vice presidential candidate atema Gopalkrishna Gandhi shimtsü mulunga agizük aser onoki pa dena jembiogo. Paia opposition indang candidate asütsü mulunga agizükogo” ta Sonia-isa shisem.
India President election atemabo JD(U)-i opposition den maden saka tanü Vice President nübo atema jatepba senden nungbo parnok denogo. JD(U) tenüng nung Sharad Yadav aden aser tadenertem rongnung Congress tir Sonia Gandhi, taoba prime minister Manmohan Singh, TMC nungi Derek O’ Brien, CPI(M) nungi Sitaram Yechury, NC nungi Omar Abdullah, SP nungi Naresh Agarwal aser BSP nungi Satish Chandra Mishra nungertem liasü.
India Vice President indang election ji August 5 nü agitsü sentong lir aser kasa anogo nikongdang votes azüngtsü.
Tanü taoba West Bengal Angh, Gopalkrishna Gandhi-i Opposition longjemba atema tenüngsang agütsü.
“Ni kü tenüng benokbaji pelashishia agizüker. Opposition party tem longjemer vice president candidate atema ni shimba atema parnok nem tenüngsang agütsür” ta paisa shisem.
Gopalkrishna Gandhi ya Devdas Gandhi o C Rajagopalachari’er jala Lakshmi na jabaso lir aser pa April 22, 1945 nü aso. 1968 nungi 1992 tashi pa IAS officer ka liasü.
1985 nungi 1987 tashi Gopalkrishna-i Vice President atema Secretary, 1987 nungi 1992 tashi President atema Joint Secretary aser 1997 küm President indang Secretary mapatem inyak.
2000 küm pa Sri Lanka nung High Commissioner aser 2002 küm Norway nung India atema Ambassador inyakogo. Paisa Lesotho nung High Commissioner for India aser Iceland nung India atema Ambassador mapatem inyakogo.
2004 küm pa West Bengal nung Angh inyaktsü shim aser kümsük tembanga inyak. 2012 küm Mamata Banerjee-i pa dang Vice President candidate asütsü atema asüngdang saka pai magizük.