Opposition-ia sorkar anema ochimashi ken o benoka mali: Modi

Belgaum, February 27 (Agencies): Honibarnü Belgaum,Karnataka nung aluyimertem lokti senden ka nung jembidang Ato kilonser, Narendra Modi-i, tamalen sorkar ama masü saka par minister temibo ochimashi anema akanga inyaker, ibayongji par sorkar aitsütsü atema opposition nem maongka magütsür, ta ashi.
“Delhi nung ozü sorkar tashii aruba mapang ochimashi ajanga linük ajunga timtema liasü, saka tanübo ozü sorkari junga yimsüsüba ajanga onok anema opposition-i ken o kata benoka mali,” ta Modi-i ashi.
Par sorkari inyaktetba mapatem tenüngsanga pai, “Tanü alima ajaki India dak teimla kaa ranglokdar,” ta ashi.
Rongsenkettsüng nung tongti linüktem aika ajemzüka alur, ajisüaka India bo kanga kara indar, ta Modi-i ashi. Tanü iba senden nung taoba Karnataka chief minister aser BJP MP, BS Yeddyurappa-a liasü.
Tanü pai aluyimertem den jembiba ya aluyimertem nüngdak balala den külemi aluyimertem atema par sorkar benokba “Prime Minister Fasal Bima Yojana” scheme metetdaktsütsü asoshi ayonga liasü.