Opposition lenirtemi Mongolbarnü EC ajuru

New Delhi, Monupii/May 21 (Agencies): May 23 nü Lok Sabha election votes azüng metenzük tsüngda Mongolbarnü opposition lenir 22-i Election Commission (EC) den ajurutepa, polling stations mashi ishika shimmer VVPAT slips asadangshitsü atema khangogo.
Parnokisa, VVPAT asadangshiba mapang aibelen kar danga ngutetra iba Assembly segment nung polling stations ajak indang VVPAT paper slip tem noklang nung noklang shilem züngshitsü aser electronic voting machine (EVM) indang results den medemdangtsü atema khangogo.
“Onoki EC dang VVPAT machine tem mezüng azüngtsü aser iba sülen meputepba kar ngutetra iba segment nung VVPAT machine ajak züngshitsü shiogo,” ta Congress lenir Ghulam Nabi Azad-i EC ketdangsertem den senden amenba sülen ashi.
Azad den külem party lenir Abhishek Singhvi-i ashiba agi, ita ishika EC dang mepeshia aruaka Election ketdangsüba teloki iba ken o asateptsü asoshi Bohbarnü ajuruteptsü ta shiogo.
“Onoki EC dang nüburtem tejangraba akhümtsübutsü asüngdanger. Iba ya mashiyimi mamshitettsü,” ta Telugu Desam Party (TDP) lenir N Chandrababu Naidu-i ashi.
Bahujan Samaj Party (BSP) lenir Satish Chandra Mishra-i ashiba agi, “Uttar Pradesh nung EVM dak sendakba nung aibelen aliba indang ashishitepdar. Onoki central force yoktsü akhanger.”
Opposition party temisa vote mazüng tsüngda EVM tem belenshiba indang ashishiogo aser EC dang iba ken o asadangtsü asoshi mepeshiogo.
Opposition party-i vote tem ochishia aser linük nung aliba nüburtem tejangraba akhümtsübua azüngtsü asoshi akhanger.