Opposition longjembaji BJP atema amokmeren ka masü: Amit Shah

New Delhi, Monupii/May 26 (Agencies): Tanü BJP National Tir, Amit Shah-i, 2019 küm Lok Sabha election atema NDA sorkar teloktep anema opposition party longjembaji BJP asoshi amokmeren ka masü, ta metetdaktsü.
Paisa, Ato kilonser, Narendra Modi-i meneni takok angutsü, ta metetdaktsü.
Centre nung NDA sorkar küm pezü abensaba dak sendakba nung New Delhi nung osangbenertem den jembidang Shah-i, voter temi Modi aser mejangjaba lenir ka na tsüngda vote agutsütsü, ta ashi.
Karnataka Assembly election agiba sülen BJP anema opposition party tem longjemba dak sendakba nung tasüngdangba ka langzüdang Shah-i, “2014 küm parnoki onok anema toktep. Parnok longjema liasü. Peipei tesem nung parnok lenirtem lir,” ta ashi.
Paisa, “Mamata (Banerjee) aser (Chandrababu) Naidu na sabang ka nung longjemra ibaji ajanga West Bengal aser Andhra Pradesh nung kecha balaka masütsü,” ta ashi.
“(Sitaram) Yechury aser (H.D.) Kumaraswamy na longjemra ibaji ajanga Bengal aser Karantaka yimtenren nung kechi temelenshi adoktsü? Parnok ya regional lenirtem lir aser parnoki BJP anema longjemer toktep,” ta paisa shisem.
“Mamata, Akhilesh (Yadav), Mayawati, Sharad Pawar aser Rahul (Gandhi) nunger ajaki onok anema toktep. Parnok state nung parnok asoshi BJP ya yimtenren nung tongti tanemertem lir. Yangji tangartembo mesükshir,” ta pai ashi.
Lok Sabha by-elections nung BJP-i tamakok anguba dak sendakba nung tasüngdangba langzüdang Shah-i, General election aser by-election naji balala, aser Lok Sabha election agitsü ano küm ka lir, ta ashi.
“Narendra Modi asü shiba Ato kilonser asütsü ta temelungjang nung bilema sorkar akumtsü atema vote agütsüba, aser bye election atema vote agütsüba naji khenyongi balala,” ta pai ashi.
Modi sorkari inyakba mapatem metetdakja BJP Tiri, “Onoki schemes balala ajanga nisung crore 22 tajangzük ngudaktsüogo, iba denji külemi alima jenjang nung linük jenjang asentenshia ajungketogo,” ta ashi.
“Taruba election nunga nüburtemi Ato kilonser Narendra Modi nem vote agüja majority angutsü ta onoki imlar,” ta pai ashi. “2022 küm tashi nungbo nisung ajak pei meyong kidang alitsü,” ta paisa shisem.