Opposition maliba sorkar

Opposition tetezü anema apusoba, anungji tenüngbo tamajung saka yimten nungbo nübortem asoshi tongtibang shilem agirtemji opposition menden nung amenertemji lir. Aji oda, alima nung democratic sorkar akümdang yimsüsürtem rongnung “Ruling” aser ” Opposition” ta alitsüsa apitetbaji kanga shisa kaa inyakogo ta bilemdi. Tanü India tatar senden nung amener tatartemi shilem agiba reprangdangra sorkar nung alirtem dang nungibo opposition nung alirtemiang tajungba shilem agiba angur. Atangji, tatar senden junga mementettsüsa opposition purtemi tatar senden nung timtem agüja asaperangbajia majung, saka taoba UPA sorkar mapang BJP telok opposition nung alidang, BJP teloki sorkar nung alirtemi tim mesüi inyakba mapa ajak mita kanga sashia anema apusoba agi, sorkar nung alir yimsüsürtem karbo tepuokdak ayutsüsa akümba asenoki nguogo.Iba amaji anema tapusodak nunga UPA mapang sorkari meshitak inyakba tang tashi kanga jembir. Iba kasaji tang BJP teloki aniba NDA sorkari yimsü asüba mapang ya Congress telok opposition nung alinungji, parnokia tang sorkar nung alirtemi meshitaki inyakba mapatem anema tatar senden nung ola kanga sashia adoktsü imlar. Iba amajika tatar senden alidang aser malidanga opposition teloki sorkar inyakyim mita manidakra alima agi matitsü aser yimsüsürtemi akhi chuba tamajung mapang amato nübortem alar jenjang nung yutsütsü. Tanü Nagaland sorkar tia ya reprangdangra, opposition mali nungji tangatsübo kanga junger saka mapa inyaka aobaren nung nübortem kanga akoksatsü. Atangji, Nagaland nung opposition malibaji tang dang masü saka taoba mapanga Congress teloki yimsü asüdang mapang kabo opposition mali amato ser aruogo. Ashiko, iba mapang to opposition menden nunga yimsüsürtem sashisashia lir asünungbo, tanübo Nagaland ya kanga junga renloker lila ta bilemer. Aji oda, tang Nagaland tatar senden nung opposition menden nung tatar kata mali ser yimsü asübaji nübortem asoshibo takoksa asütsü. Yimten aser loktiliba nung kodang nübortem ajangzükdir, ibaji yimsüsür aser lenir kari pa mesüra la takoksa arema inyakba ajanga nübortemji ajangzüker ta asenoki angatettsüla. Aji oda, yimsüsür ka opposition nung amenbaji pa mesüra la atemabo takoksa tulu lir saka pai mesüra lai takoksa arema aser nüngsen tizükteta sorkari meshitakba inyakba maparen anema ola adokbaji nübortem asoshi tenla tulu asütsü. Tanü Nagaland jungdi süra tatar senden nung aser lokti nung sorkari meshitakba mapa inyakbatem yimjak nung tuteta anema apusor alitsüla. Ibaji alima aser nübor meimertemi inyaktettsü. Atangji, election nung opposition malitsüsa yimten telok ka nungi dang tatar ajak adokra, ajibo otsü balaka asütsü. Iba ama mapang nungji lokti tentettem aser senso shiai sorkar nung alirtem nem ochishia yimsü südaktsütsüsa kanga junga mita anidaktsüla. Ajisüaka, tang Nagaland tia yabo election nung adokba agi masü saka yimten asayaba nung asayatetba dang lir. Aji oda, opposition nung amentsüsa Congress telok nungi tatar ti alinung, ano parnok ajakji sorkar nung dena adokba agi Nagaland tatar senden nung opposition mali kümogo, anungji yimsüsürtemi shinga nüken metsübui mashimashi yimsü süa aotsüa akok. Idangji, senso shiaji opposition ama kümer sorkari tim mesüi inyakba mapatem anema ola adoka shilem agitsübaji kanga tongtibang asütsü. Ano, teratatsü kaji Nagaland nung Congress tatarbo ajak sorkar nung aden saka partybo maden ta asüba yagi tatar ti tarutsü indangji mejangjar. Tang parnok ya ‘suspend’ nung lir saka ano AICC ajanga parnok ti prongla ‘disqualify’ sütsü nunga koma süla (?) ta asenoki taoba hopta nung bilemdanga shisalemsatepogo. Iba shisalemsatepba nung shilem agirtem ajanga tatar senden nung opposition nüngdakba indang asenoki angatetogo. Atangji, Congress ti tia indang bilemtsübaji kangabo nüngdak madoker, ibajibo parnoki tajungba meteta lir. Ajisüaka, asenok asoshi tongtibang nüngdakjibo, koba teloki yimsü südir süang, nübortem nüken tsübua aser nübortem meima yimsü sütettsü atema tatar senden nung opposition sashisashia alitsübaji asütsü.