Opposition maliba sorkari Naga yimten tebilemtsü atema inyaktsü : TR Zeliang

Kohima, November 23 (TYO): Congress MLA 8-i Naga People’s Front (NPF) nung adenba ajanga opposition maliba sorkar tentetogo aser iba ya ajanga Naga yimten tebilemtsü atema telemtetba ka bener arutsü asoshi sorkari mapa inyakba tashi itshitsü, ta Nagaland Chief Minister T R Zeliang-i ashi.
Taküm February 5 nü state Assembly nung Chief Minister T R Zeliang lenisüba atema vote of confidence agitsü mapang opposition Congress MLA tem NPF-i aniba Democratic Alliance of Nagaland (DAN) sorkar nung aden.
Congress MLA temi party teinyaktsü anema inyakba aser BJP adenba teloktep DAN sorkar nung külemi adenba atema AICC-i Congress MLA tem telok nungi anentsü. Ajisüaka, TR Zeliang-i Congress MLA tem par ministry nung züngoka Minister, Parliamentary Secretary aser Deputy Speaker mapatem lemzüktsü.
Taküm September 4 nü Congress-i Nagaland Assembly Speaker tsüngdang MLA 8 anema disqualification petition agütsü saka November 20 nü parnok ajak NPF den lokteper ta asüba osang yimjak nung metetdaktsüogo.
Tanü nikongtsütsü osangbener senden nung Chief Minister TR Zeliang-isa ashiba agi, NPF Party-i opposition maliba sorkar ka tentettsü mapa inyakba asangsang nung atalokogo aser ‘opposition maliba sorkar’ mezüngbubaji par sorkar lir ta shisem.
Congress MLA 8 tashi NPF den loktepba sülen tang Nagaland Assembly nung NPF – 46, BJP – 4, NCP aser JDU nungi züngsem ka ka aser Independent MLA 8 lir.
“Naga yimten tebilemtsü asoshi telemtetba ka agitsü atema opposition maliba sorkar ka tentettsü ajungmeso” ta TR Zeliang-isa metetdaktsü.
“Ajisüaka, opposition maliba sorkar ka tentetba kija jagi meperir, saka yimten tsütsü meputep mesüra mangatettep alibatem mezüng angatetteptsüla. Tamasa asenok telok ka kümer inyaktsüla aser küm 60 den timba telemtetba monguteti aruba Naga yimten tebilemtsü atema tatembang telemtetba ka agitsü asoshi meranga inyaktsü nüngdaker. Asenoki Naga nunger taginüba tongtetdaktsütsü atema külemi longjemer inyaktsü tensa ka ajuruogo” ta paisa shisem.
Taküm küm tetenzüklen NPF sasep nung mepetmesü tensa tulu ka ajuru aser iba jagi DAN sorkari assembly nung vote-of-confidence agitsüsa aküm. February 5 nü vote-of-confidence agidang züngsem ajaki confidence motion pusema nungit aser iba ya loktiyimten yimsüsüba otsü nung mangashidangba otsü tasen ka liasü. Iba nung ajemdaker opposition maliba sorkar ka tentettsü onok mulungjang nung ajungmeso, ta chief minister-isa ashi.
“NPF party sasep nung yimjung yangluba sülen iba mangdang tashitaitba aküm aser opposition bench nung aliba züngsem ajaki (Congress MLA 8) sorkar nung adenba ajanga tashi itshiogo. Ajisüaka, ozüng kübok teinyaktsü kar aliba ajanga Congress MLA tem NPF legislature party nung loktepba maparen metembangtet” ta TR Zeliang-isa shisem.
NSCN(K)-i ceasefire agienaka, Nagaland Legislative Assembly nung züngsemtem ajak longjemba jagi Naga yimten tebilemtsü atema telemtetba agitettsüsa asü koda ta osangbenertemi asüngdang TR Zeliang-i ashiba agi, par sorkari NSCN (K)-i India sorkar den maneni ceasefire alitsü atema mapa inyakdar, ta langzü.
Tanü osangbener senden nung taoba Congress MLA, C Apok Jamir-ia ashiba agi, Naga nungeri yimten telemtetba ka tekaratiba nung aginüba nung ajemdaker Congress MLA temi telemtetba shitak agiogo.
Ano, NPF President Dr. Shurhozelie-ia iba onük jembidang ashiba agi, Gauhati High Court nungi tetuyuba agütsüba ajanga Congress MLA tem NPF den loktepbaji ozüngi melaba inyakyim ka lir.
High Court-i NCP MLA 3 BJP nung adenba pusema obendang agütsü aser iba mapang parnoki party MLA tem asemsü nungi anasüi tanga telok nung adenbaji Anti-Defection Law kübok maittsü ta oshidang agütsü. Anungji, Congress pur noklang shilemi NPF nung aden aser aji agi parnok Anti-Defection Law kübok maittsü, ta Dr. Shurhozelie-isa metetdaktsü.
MEDIA-ASSAM RIFLES onük:
Osangbenertemi Nagaland Angh, P B Acharya-i Assam Rifles pusema jembiba onük atema asüngdangdang CM Zeliang-i iba osang angashidang pa kanga aoksa liasü, ta langzü.
“Angh-i jembiba onükji state sorkari lemtetba masü. Assam Rifles-i Nagaland nung osangkakettem nem tetuyuba agütsüba osang sangdongba sülen Angh, ni aser kü külem cabinet züngsemtemi Raj Bhavan nung IGAR(N) MS Jaswal aser par telok den senden ka agi” ta chief minister-i osangbenertem dang ashi.
“Iba mapang onoki Assam Rifles den NSCN(K) indang onük lemsatep aser parnok dang NSCN(K) telokji balaka asüyonga India sorkar den cease fire tenangzükba agitepa aliba teloktem nem timtem magütsütsüla ta ashi. Anungji Angh-i iba onük jembiba atema aoksar aser pa November 28 nü Nagaland-i meyipa aruba sülen sorkari pa den ajurutepa sensak asemtsü” ta TR Zeliang-isa ashi.
NPF Party-ia iba onük atema kechi ashir ta asüngdangdang, Dr Shürhozelie-i “onok nenok (osangkakettem) den lir” ta langzü.