Opposition medeni democracy alitsü makok: Rajnath

New Delhi, December 06 (Agencies): Democracy nung opposition ji tongtibangtiba, aser ibaji medeni democracy melitettsü, ta tanü Union Home Minister Rajnath Singh-i ashi.
Dr Babasaheb Ambedkar sür küm 60 ajungba anogomung dak sendakba sentong ka nung jembidang Home Minister-i, “Sorkar indang shilem aser tesendaktep aliba Democracy tajung ka nung opposition atema-a tongtibang shilem ka lir. Democracy tajung ka atema opposition ji tongtibangtiba. Opposition mendeni democracy alitsü makok,” ta ashi.
Iba sentong nung Lok Sabha nung Congress lenir Mallikarjun Kharge-a dena liasü.
Iba sentong nung Congress lenir Kharge-a jaokba atema Labour Minister Bandaru Dattatreya nem tenüngsang agüja Rajnath Singh-i, taoba minister aser Congress lenir jaokbaji India Temzüng latettsang, BR Ambedkar indang tesayuba ama lir, ta ashi.
Tanü iba sentong nung Minister of State for Parliamentary Affairs, Mukhtar Abbas Naqvi-i, Hombar nungi tenzüka Rajya Sabha nung benoktsü aliba onüktem rongnung Goods & Services Tax Bill (GST Bill) aser Real Estate Bill na densema lir, ta metetdaktsü.
Joko mapang tatsüka opposition Congress aser sorkar na tsüngda GST Bill atema tekong merangtepa o toktep kayonga arudar.
Tesüiba mapang labour minister Dr Ambedkar tenüngsanga Singh-i, paji India Temzüng latetsang dang masü saka modern India latetsang lir, kechiyong pai tongtibang reju ana- Reserve Bank of India aser Finance Commission tamendakdak yanglutsü, ta ashi.