Opposition nung ali maremer

Yimten nung yimsüsür tangatetba tendangtsüba mapangji opposition nung aliba mapang ya lir. Opposition nung asünungji yimsüsür süaka yimsüsütsü tashi mali kanga timatemer. Ajisüaka, pei party tangatetba lira iba tangatetba jagi timtem aremtetter aser kenübosa yimsüsütsü maongka angutsü ta teimla tulu nung pei telok tangatetba nungi mepilar. Aji oda, India nung yimten nüchiso nguli nungi, khen khen mapang tatsütsü yimsü asüba dak alaka, taoba küm ana jakdang tashi Congress teloki dang yimsüsüra aruogo. Idangji opposition nung alirtemji tang BJP teloki aniba sorkar nung alirtem ya liasü. Atangji, tang Narendra Modii aniba sorkar nung metentetaka opposition nung dang timtem lendong ajak tizükteta pei yimten telok tangatetba nungi maitsüi nokdakertemji A.B.Vajpayee aser L.K.Advani nungertem ya liasü. Parnok aser parnok sülen anidakertemibo taküm piyong amato opposition nung ali arema yimten nung shilem agiogo. Aji oda, parnok ama yimten nung tangatetter aser tashitemetetter aliba agi ‘ruling’ nung alirtemia opositiin nükentsübua yimsüsüa aruogo. Iba kasaji Nagaland nunga yimten yimsüsürtem rongnung opposition nung timtem arema amenba yimsüsürtem rongnung Shurhozelie ya ka asütsü südi. Atangji, shingaia opposition nung meliner ajisüaka timtem marem pei telok toktsür ruling nung amenba agi alimabo meyanglutettsü. Shitakba shidi asünungbo, opposition purtemi opposition ama shitak tashi itta ali nungbo ‘Ruling’ purtemi masü saka opposition purtemiang government anir aotsü, kechiyong ‘Ruling’ nung alirtemi opposition tsübua ochishia yimsü asütsü. Asen lima ama Parliamentary Democracy nung topur tajung aser nübortem ajangzüktsüba lenmangji aji lir. Asenoki asen state nung atalokbatem khen yutsür tang anogo ishika tsüngda Arunachal Pradesh nung atalokba ya reprangdangra, Congress teloki yimsüsüa aliba nungi chief ministeri anir Congress nungbo nisung ka dang toktsür People’s Party of Arunachal telok nung oa adenbaji tanga kulia alitsüa akok saka tulubajibo center sorkar akümba telok den medeni opposition nung melinüba agi telok ka toktsür ka nung adenba  otsüang asütsü. Item jagibo ano taruba election nung center nung Congress telok arura ano Congress telokisa meyiptsü. Aji oda, pei tangatetba nung masü saka tangar menden nung alirtem sülen oli aruli senzürtemji tejok majet takidak maka küma aotsü. Yimten nungbo tangatetba ka alitsüla aser iba tangatetba nem anidaktsütsüla. Ajisüra, shinga tsütsüa mereprangi tajungba tajungba inyaka aotsü aser kenü anogobosa Tsüngremi yimsüsütsü maongka agütsütsü. Yimsüsür ka asoshi ‘Ruling’ aser ‘opposition’ mali, ochishia timtem arema nübortem tenzüktsü. Iba nungji jangratemtsü lir. Opposition nung alidanga Ruling purtem meshitak inyakba ajak pua anidakra, iba jagi nübortem ajangzüker aser Ruling nung alirtemiang Opposition nung alirtem akümtsübutsü. Aji oda, asen lima nung yimsüsürtem opposition nung timtem arema nübortem  asoshi tatar senden nung ken o benoka jembir mali tashi nübortem  kanga timatemtsü. Tang Nagaland nunga gari lenmang ajak ayong ama akümba ya, Kohima nung government office nung mapa inyaker marur aser tanga district aser sub division nungbo government office aika kibur mali menen ki amato akümba ya aser anogo shia telok balalai temulung masü ken o metetdaktsüba ajak ya opposition maliba tamaitsütem asütsü. Koba state nung südir süaka tatar senden nung opposition malibaji nübortem asoshi osangtajung masü anungji kangabo mepelateptsüla. Tang asen lima nung tatar senden nung opposition malibaji auer kanga alidak ki mashi toktsür ao amai lir. Joko, nübortemi dang aser talisa telok tentettemi yimsüsürtem dang pei telok tangatetba aser nübortem meimba shisatsü dener election nung tokteptsü ajungshiteptsüla. Opposition maliba agi state shiranger saka tashidak meputetter, anungji tashidak puteta anepalutsü asoshi  opposition nung asüyonga timtem arema nübortem tenzüktsü pur bushia yimten nung shilem agidaktsütsü junger.