Opposition nüngdaker

Tang mapangba ya Nagaland nung nübortem asoshi kanga nüngdakbaji Nagaland Legislative Assembly nung opposition telok ka nüngdaker. Democracy lima nübortemi shimtetba yimten nung telok balala (political parties) tenteta yimsüsürtem shimtsü aser parnok rongnung tatar menden teimba angurtemi government akümtsü aser tanüngba tatartemji opposition menden nung amentsü. Atangji, opposition mapaji government-i inyakba ajak anema mesüra aija anidaktsüba masü saka government-i atongba sentong aser inyakba maparen nunga yariteptsü asoshi committee balala nung shimoker. Ibaji ajanga government nung alir yimsüsürtemi mulungba nung dang masü saka nübortem ajangzükdaktsütsü bilema opposition tatartemi government nung alirtem kümdangshidaktsür. Ajisüaka, tang ya Nagaland tatar senden nung opposition maliba ajanga nübortem meteta aser memeteti maparen aika nung akoksadagi. Opposition mali nungji government nung yimsüsürtem kecha tarendaktsü mali, kechi inyakdir inyakaka tebushir mali ta asüba nung pei inyaknütsü inyakba mapangji tang ya lir. Atangji, opposition meliaka, Naga nungertem tia ajung mulungtet telok kari state nung opposition ama government inyakyim nung tai reprangtetba tashi temai jungkai adoka metetdaktsür aser bushisüngdangtsü akanger. Ibayongji, government nung alirtema kanga sademabo mawazütetter. Ajisüaka, tatar senden nung opposition maliba agi shitakba nübortem asoshi ken o benoka jembidak assembly nungbo government-i meshitaki inyakba anema ken o benokerbo mali senden senshir. Aji oda, kima yimdong nung tapu tapu jembiaka aser osangkakettem nung tapu tapu adokaka tatar yimsüsürtem senden nung item onüktemji benoka mejembira nübortem asadenba olaji amajok kümadoker. Tanü Nagaland nung tatar yimsüsütem ajak ‘Ruling Party’ nung dang ser nübortemi aginüba mangu aser mangashi parnok sünütsü süa aoba ajanga nübortema kanga nükenbelemba aser government nung alirtema timtem ajuruba asenoki ngua arur. British government nungbo opposition tatartem rongnungia government nung alirtem mita reprangtsü asoshi department shia mapa alemer. Aji oda, Education department reprangtsü asoshi Ruling party nungi Education minister ka shimer, anungji kasa department nung inyakba maparentem repranga mittsü asoshi opposition nungia opposition teloki tatar ka shima British government nung inyaker. Iba dangji ‘Shadow cabinet” ta ajar. Iba ama inyakyim jagi government nung alirtem kanga kümdangshidaktsür aser nübortem kanga ajangzüker. Iba amaji opposition aliba o maliba na tsüngda alima aser nübortem asoshi inyaktsüba maparen nung tetsüngda talangka ittadoker. Iba amaji tangarbo pei lima aser pei nübortem ochimashi mapatem nungi kümzüktsü aser nübortem atema tajangzük akaba sentongtem dang renemdaktsütsü bilema opposition-temi opposition nung ali arema inyaker. Ajisüaka, asen lima nungbo tatar shingaia opposition nung küm kata melitetter. Asenok tatartemi o tapu tapu jembia aser kuli tapu tapu agüja opposition maliba government yangluogo. Ajisüaka, shitakba nungbo Naga yimten tebilemtsü akoktsü asoshi Nagaland nung opposition maliba government yangluba masü saka shinga ola madokdaktsüi külemi longjemer ola madoki Nagaland chireptsü asoshi opposition maliba government yangluba lir. Iba amajika mesüi Naga yimten tebilemtsü akoktsü atema longjem asübo tang yabo Naga yimten tebilemtsü koktettsü asoshi inyakba mapa karbo angashila aser metetla aser Naga yimten tebilemtsü yutsür ULB election agitsüang maritepla. Aji oda, tanübo Naga yimten tebilemtsü akoktsü ariteptsü melen Delhi nung alir yimsüsürtem dang masü saka Naga yimten tebilemtsü akoktsü asoshi jembitsür dena Nagaland nung government melentsüba nungang temulung tagütsüba agütsür amai reprangtetogo. Iba ama timtem atalokyonga aoba ngua shisaboluba agi, tang ya Nagalang nung opposition ali nunga koma süla (?) ta taoba hopta nung asenok shisalemsatepba ama maneni shisalemsateptsü ajungshir.