Opposition Party 18 longjemer Demonetisation, GST onük anemtsü

New Delhi, July 13 (Agencies): July 17, 2017 nü nungi tenzüka tzüngluruwa mongpu Parliament senden nung demonitisation aser GST onük nung sorkar anema nokdaktsü atema opposition party 18 longjemogo, ta osang ka ajanga metetdaktsü.
Taoba Mongolbarnü opposition party tem senden amendang lenirtemi item onük nung asalentong renemogo, iba senden ya tongtibangsüa linük tatong Tir, candidate shimtsü atema ayongba senden ka liasü, ta kasa osang ajangasa metetdaktsü.
Onük pongu nung opposition party tem bangjemogo, aser item onük nung parnoki Parliament, Parliament kima naprongla nung aser social media ajanga sorkar anema nokdaktsü bangjem.
Item onük ponguji: “demonetization ajanga linük nung timtem balala ajangshiba”, “GST mapa küma inyaktsü atema sorkari kanga aritepa inyakba”, “aluyimertemi ajuruba timtem aser aluyimertem soseta asüba”, “yimtenren nung ajemdaker mangyangba”, “Linük indang federal inyakyim kümzüka ayutsü” aser “lokti tsüngda rara adokdaktsütsü atema osang taila prokba” densema lir, ta kasa osang ajanga metetdaktsü.
Mongolbarnü senden nung Congress Tir, Sonia Gandhi, party tatong Tir, Rahul Gandhi, Trinamool Congress lenir, Derek O’Brien, JD(U) lenir, Sharad Yadav, NCP lenir, Praful Patel, CPI(M) lenir, Sitaram Yechury, National Conference lenir, Omar Abdullah, Samajawadi Party lenir, Naresh Agrawal, BSP lenir Satish Mishra nunger den tanga party 10 nungia lenirtem dena liasü.
Osangbenertemi asüngdangba ka langzüdang Trinamool lenir, O’Brien-i, “Party temi peipei sasep nung onük balala benoktsü, ajisüaka onük kar nungbo opposition party 18 prongla tangatetba ka nung nokdaktsü bangjemogo,” ta metetdaktsü.
Trinamool Congress national secretary aser Rajya Sabha nung party lenir, O’Brien-isa, “Onoki telok ka ama inyaker,” ta metetdaktsü.
Züngsem 545 aliba Lok Sabha nung Congress Party nungi züngsem 45 aser Trinamool Congress nungi züngsem 34 lir.
Item party 18-i opposition candidate atema Mahatma Gandhir’er semchir, Gopal Krishna Gandhi shimogo.
Ano Tir election atemaa opposition party 17-i Congress lenir, Meira Kumar shimogo.
Bihar Chief Minister-i aniba JD(U)-i Tir election nung BJP-i shimba candidate pusemtsü ajisüaka tatong Tir election nungbo Congress-i aniba opposition candidate pusemtsü.