Opposition party lenir ajak Metsüremi 13 nung Sonia-i chiyongtsü jaok

New Delhi, Metsüremi 06 (Agencies): BJP anema longjemer nokdaktsü mechi Congress lenir Sonia Gandhi-i opposition lenir ajak Metsüremi (March) 13 nung chiyongi jaok, ta party osang ka ajanga ashi.
Iba sentong ya opposition party tem longjemer Parliament nung sorkar anema nokdaktsü aser iba ya 2019 Lok Sabha election nung longjemer nokdaktsü asoshi tamendakdak yangluba lir, ta Congress telok nung züngsem kati ashi.
Linük nung shisadokten agitsü asoshi TRS tekolakba aser Telangana Chief Minister K Chandrashekhar Rao-i BJP aser Congress masüba telok tem ayongdenba mapang ka nung Sonia Gandhi-i iba sentong ya ayongzüker.
Sonia Gandhi-i iba chiyongba sentong ayongzükba ajanga Parliament nung kisüng masü saka tesem ajunga nung BJP anema opposition party ajak longjemer nokdaktsü, ta Congress telok nungi ashi.
“Ibai chiyongba kisüng masü saka BJP-i meshidaki yimsü asüba anema opposition teklo tashi ita nokdaktsü asoshi lir,” ta lenir kati ashi.
Iba sentong nung adentsü asoshi lenir aikati mulungogo, ta pai-sa ashi.
Pai-sa ashiba agi, iba sentong nung Trinamool Congress lenir, Mamata Banerjee densema opposition party lenir ajak arua dendaktsünür, saka Banerjee-ibo osang magütsü.
Parliament telung aser tema nung sendaktepa alitsü atema Banerjee-i Rao aser DMK working president, MK Stalin den jembiogo.
Budget session tanabuba shilem nung opposition teloki longkak aitba mapang lir aser parnoki House telung aser tema nung longkak aiter.
Parliament nung ken o balala nung TRS, TDP, SP, BSP, TMC, Left, DMK aser opposition telok ajak tsüngta tangatettep lir, ta TMC lenir Derek O’Brien-ia Sangtennü ashi.