Opposition party tem longjemtsüji kanga tasak asütsü: Sheila Dikshit

New Delhi, April 22 (Agencies): Joko tangbo Ato kilonser, Narendra Modi anema opposition party tem longjemtsüji tasak asütsü, ajisüaka 2019 küm tayongzükba ka arutsü, ta tanü taoba mapang Delhi Chief Minister aser Congress lenir tain, Sheila Dikshit-i ashi.
Interview ka agidang Congress lenirisa, Gandhi kibong medenibo linük nung party tejentiba (Congress)-i kecha mesütettsü, iba den külemi party tatong Tir, Rahul Gandhi kanga junga kümdar, ta ashi.
Onük balala aika nung jembidang küm 15 tashi Delhi yimsü asüla, Dikshit-i, lai kodanga Bharatiya Janata Party (BJP) nung madentsü, ta ashi.
Opposition party tem longjemer BJP anema tokteptsü atema jembiba dak sentakba nung Dikshit-i, “Ibaji (opposition party tem longjemtsü) takoktsü ka südaktsüner, ajisüaka ibaji kanga kümdanga inyaktsüla. Nisungtem jagi kati ka agizüktettsüla,” ta ashi.
“Linük atema ibaji tajung asütsü. Tang tashi nungbo kecha kümteta mali,” ta laisa ashi.
Dikshit-i, Congress-i Gandhi`er kibong lenisüba nüngdaker, ta ashi.
“Gandhi’er kibongi linük aser Congress küm aika tenzüka arudar. Congress-i küm 70 India yimsü süogo, aser ibaji Nehru-Gandhi kibongi aniba ajanga lir,” ta lai ashi.
Tawa India tesem balala nung Congress lenirtem aikati party toktsüogo, aser parnok rongnung aikati Rahul Gandhi lenisüba nung temelung masüba indang jembiogo.
Lai BJP nung adentsü asü? ta asüngdangba langzüdang Dikshit-i, “Tamakoktsü, ni tanaben aso nunga madentsü, onok tangatetbaji khenyongi balala,” ta ashi.
Tasüngdangba ka langzüdang Dikshit-i, peipei tesem nung alirtem lenir shimtsüji Congress atema tongtibang, ta ashi.
“Indira (Indira Gandhi) aser Rajiv (Rajiv Gandhi) nati lisopur rongnungi dang lenirtem shima liasü. Temelenshi balala benokba ajanga jenjang ajungtsü,” ta lai ashi.
Uttar Pradesh assembly election nung Chief Minister candidate atema la shima liasü saka lai tesülen ibaji magizüki liasü. Iba sülen state nung party-i tamakok anguba atema lai state unit Tir, Raj Babbar aser General Secretary, Ghulam Nabi Azad na nem tai tongloktsü.