Opposition party temi BJP candidate anema candidate shimtsü

New Delhi, June 19 (Agencies): Tanü BJP-i aniba NDA-i linük Tir candidate atema Bihar Angh aser Rashtriya Swayamsevak Sangh (RSS) nungi Ram Nath Kovind tenüng sangdongba sülen opposition party temi June 22, 2017 nü senden amentsü telemtetba agiogo, aser iba senden nung parnoki Kovind den tokteptsü atema candidate ka shimtsüa akok, ta osang angazüker.
Tanü BJP-i linük Tir candidate sangdongba dak sendakba nung Congress lenir, Ghulam Nabi Azad-i, “Congress-i iba onük nung kecha mejembiner, kechiyong Tir election atema opposition party tem den ang külemi telemtetba ka aginer,” ta metetdaktsü.
“Tir candidate atema tatembang telemtetbaji opposition party tem senden nung ang agitsü,” ta Congress lenirisa metetdaktsü.
Trinamool Congress otongdar, Derek O’Brien-ia, “BJP-i osangbenertem senden nung Kovind candidate shimba sangdongba sülen ang onoki iba osang angazük. Shingaia onok dang mashi,” ta metetdaktsü.
CPI(M) general secretary, Sitaram Yechury-i, “Ramnath Kovind ya RSS lenir ka lir. Iba tetezü pa yimtenren tangatetba ka nungi lir. Anungji iba ya yimtenren rara ka lir,” ta ashi.
Nationalist Congress Party otongdar, Nawab Malik-i, “UPA nung adenba party ajak June 24, 2017 nikongdang 4:00 ako nung senden mena opposition nungi linük Tir candidate shimtsü. Iba senden nung NCP-a adentsü,” ta metetdaktsü.