Opposition party temi Irani dang tatok meshitsü akhang

New Delhi, Feb. 26 (Agencies): Yashi Rajya Sabha senden nung JNU kaketshirtem anema jembidang Human Resource Development (HRD) Union minister, Smriti Irani-i tsüngrem ka anema tashishitsü o jembiba atema tanü Rajya Sabha nung opposition party temi, lai House dang tatok meshitsüla, ta takhangba agütsü.

BJP züngsemtemia Congress aija, Congress tatong Tir Rahul Gandhi-i JNU semdangba aitsüba ajanga party-i iba ken o benoker, ta ashi.

Tanü senden tenzükba sülen Rajya Sabha nung Congress Deputy Lenir, Anand Sharma-i, “Senden nung tsüngrem anema jembitsü aser tamangertem melung yirutsüsa onük süoka jembitsü linük Temzüng ajanga memelar,” ta ashi.

Paisa, Irani-i senden nung Durga tsüngrem anema jembiba ajanga tamangertem temelungjang yirutsür ta shia Chairman dang, tsüngrem anema Parliament adener jembiba otemji senden telung nung jembitsü akok asü, ta asüngdang.

JDU züngsem, K C Tyagi-i, Irani-i iba atemaji tatok meshitsüla ta takhangba agütsü, aser opposition züngsemtemia pa pusema liasü.

Ajisüaka Irani-i, “Ni hindu lir aser Durga amanger ka lir,” ta dang langzü.

Laisa, kaketshirtemi linük anema inyakba indang kuli la dang aiben asüngdangba ajanga lai item oji JNU nungi anguba kaket ka nungi azüng, ta ashi.

Iba sülen Opposition Lenir, Ghulam Nabi Azad-i, “Süoki ia agitsü ken o ka lir aser yashi minister-i jembiba o atema lai tatok meshitsüla,” ta ashi.

Congress lenir Azad-i, tamangba tsüngremtem anema onük aika lir, ajisüaka item ajakji senden nung süoka jembitsü makok, ta ashi.

Ano tanga osang ka nung Parliament nung Hyderabad University nung Dalit nunger kaketshir, Rohith Vemula soseta asüba ken o nung jembidang Smriti Irani-i, Rohith kümzüktsü asoshi shingaia memerang aser dotor nem pa temang reprangdaktsütsü nokdang ta jembiba dak sentakba nung Dr, M Rajshree-i, January 17 aonung lai Rohith temang reprangogo aser lai pa asüba sangdong ta shiogo.

Brihostibar nikongdang osangbenertem den jembidang University of Hyderabad health centre nungi Doctor Rajshree-i, “Iba aonungji ni Rohith temang repranga liasü aser pa süogo ta ni sangdong,” ta ashi.

Chief Medical Officer, Rajshree-isa, “Rohit tasümangji pakti ka nung liasü aser pa asüba aonung 7:20 ako meta kü dang kaketshir rongnung kati soseta asütsü merang ta osang metetdaktsüba sülen ni hostel takdangji atong, iba sülen minute 15 lir police aru,” ta ashi.

Parliament senden nung jembidang HRD Minister Smriti Irani-i, “Iba anogo nung research scholar Rohith Vemula tasümang anasa aotsü nisung shinga memela, pa kümzütsü mesüra hospital-i anir aotsü memela,” ta jembia liasü.

Irani-i, “Doctor ka pa anasai aotsü shingaia memela. Iba tanur shia arudaktsütsü atema shingaia memerangdang, pa doctor dangi anir aotsü shingaia memerang ta police-i osang agütsüogo. Ajisüaka pa tasümangji yimtenren hadir ka ama miima yur amshi. Iba anogo tasüngnepji 6:30 ako tashi police aotsü memela. Iba o ya ni ashir masü saka Telangana police-i ashir,” ta lai jembia liasü.

HRD Union Minister Irani-i jembiba o nungji doctor Rajshree-i ai-aura makaba dang masü saka police-ia parnoki iba osangji Ministry nem magütsü ta shiogo.

Irani-i Parliament nung jembiba o nung ajemdaker Hokolbarnü Rohit’er kinüngertemi, Parliament nung Union Minister-i yazü jembiba ajakji parnoki jungkai adoktsütsü, ta shiogo.