Opposition teloktep kechaia BJP menokdangtettsü: Amit

New Delhi, February 09 (Agencies): Taruba Lok Sabha election nung nisung tamajungertemi takok ngua sorkar kümra India ainba anentsü aser terenlok anentsü, ta tanü Bharatiya Janata Party (BJP) Tir, Amit Shah-i metetdaktsü.
Ato kilonser, Narendra Modi-i aniba BJP sorkari linük terenlok lenmang tasen ka nung aniogo, ta shia pai, elections ajanga linük tarutsü tia latettsü, ta ashi.
Party lenirtem senden ka nung jembidang Shah-i, “Küm 55 nung meinyaktetba Modi-i ita 55 nung inyaktetogo. BJP-i terenlok nung rangloker inyak, aser tawa benokba budget ajanga lokti nung ajak nem temeden agutsüogo,” ta ashi.
Mumbai nung ayongzükba senden nung Maharashtra Chief Minister Devendra Fadnavis-a densema liasü.
BJP ya lenirtem masü saka mapa inyakertem party ka lir, ta shia pai, tesüiba küm pongu nung party-i kibong kati tashi amshiba samatsü, ochimashi samatsü aser terenlok lenmangi ani, ta ashi.
Opposition party tem aija pai, taruba election nung BJP-i takok angutsü alibaji shingaia menokdangtettsü; opposition teloktep kechaia asenok menokdangtettsü, ta pai ashi.
Kasa sentong nung jembidang Fadnavis-i, 2020-2035 kümtemji linük atema kanga tongtibang asutsü, kechiyong iba mapang nung India-i China aser US rongsenkettsüng ajatettsü, ta ashi. Paisa, terenlok onüktem nung tetsükdaktsü malitsü atema taruba election nung BJP nem vote agutsütsüji kanga tongtibang, ta ashi.
Pai Maharashtra nung aliba nüburtem dang state nung Lok Sabha menden 48 prongla nung BJP aser teloktep party tem nem takok ngudakjang, ta mepishi.