OPS-i ano MLA 11 ngura Sasikala-i state sorkar mekümtettsü

Chennai, February 12 (Agencies): Tamil Nadu nung anogoshia AIADMK MP tem aikati chief minister, O Panneerselvam (OPS) telok den tendar; tesüiba anogo ishika tsüngda Lok Sabha aser Rajya Sabha MP 10-i chief minister kidang pa ajuruogo.
Tang tashi nung MLA 7-i chief minister pusemer, aser pai ano MLA 11 ngura AIADMK general secretary, V K Sasikala-i sorkar akumtsü atema maongka mangutsü.
Deobarnü MP 5- Vellore MP B Senguttuvan, Tuticorin MP Jeyasingh Thiyagaraj Natterjee, Villupuram MP S Rajendran, Perambalur MP R P Marutharajaa aser Rajya Sabha MP, R Lakshmanan nungeri chief minister Panneerselvam ajurudang pa pusemtsü ta sangdonga liasü.
Honibarnüa AIADMK Lok Sabha züngsem 4- P R Sundaram, K Ashokkumar, V Sathyabama aser Vanaroja nungeri pa pusemtsü ta nangzük.
Ano Rajya Sabha MP, V Maitreyan-a Panneerselvam camp nung lir.
Deobarnü actor Ramarajan den kari chief minister dang pa pusemtsü ta nangzükogo. Anogoshia party züngsemtem aikati Panneerselvam ajurua pa pusemtsü ta sangdonger, aser par kima nisung jenti adenshia asem tema tsüngsangteper.
Ano külen tanü VK Sasikala-i, lar party-i la lenisüba kübok ano küm pezü ser tesadang state yimsüsütsü, ta ashi.
Yimtenren nung tetsür lenirtem anema inyakba ya tang tasen ka masü, ta shia Sasikala-i, “Amma (taoba chief minister asür, J Jayalalithaa)-ia party anidang tetsükdaktsü aika ajuruogo. Aser item küm 33 prongla nung ni la den külemi item tayongzükbatem ajangshiogo. Iba ya kü asoshi tang tasen ka masü,” ta ashi.
Tang MLA trok shi camp nung masü saka Chennai nung lir ta osang angazüker.
Deobarnü Sasikala aliba kima nisung 150 shi dang adenshia liasü, aser ibaji ajanga la pusemer ajema akumba kuli angur.