Oriental College nung Smart Class aser website amala saya

Kohima, July 27 (TYO): Alima ajunga nung ‘smart tutorial’ amshiba den külemi Oriental College, Kohima-ia densema tanü official website, degree courses atema smart class, Day Care Centre aser Gymnasium nungertem sayaogo.
Tanü iba college 21buba Fresher’s Day amongba mapang Higher Education Director, Kuholi Chishi-i oreintalcollegekohima.in website aser tanga sentongtem sayatsü.
Kuholi-i iba sentong nung jembidang kaketshir dang angazüktsü, apijemtsü aser takok angutsü yimya sübatsüla, ta ajungshi. Kaketshir kati akok tashi angazüktsü asoshi renema alitsüla aser angazüka aliba tem apijemba ajanga taküm nung takok angutsü, t alai shisem.
Takok anguba ya jenjang aika lir aser tako kisüng anguba ajanga taküm nung tajangzük balaka mangutsü, anungji temaba jenjang nung takok angutsü merangtsüla, ta Director-i shisem.
Taküm academic session atema Class 11 Arts aser Commerce stream, BA aser B Com atema kaketshir 202 tenüng züluoka lir, ta Oriental College principal, Dr Ketshukietuo Dzüvichü-i ashi.
Class 10 aser 12 tatidang nung takok anguba kisüng ya tatem masü saka iba ya lenmang tasen tenzüker ka asütsüla, ta Dr Ketshukietuo-ia kaketshirtem ajungshi.
Information technology nung alima kanga kera melenshia aoba den külemi jaja college tajungtiba kümdaktsütsü asoshi college ketdangsertemi meranga inyaka arur, ta Principal-isa shisem.
College indang library digital kümdaktsüba den külemi degree course agirtem IT facility amshia tangazükba ngutettsü mechi smart class room ya amenlok, ta pai metetdaktsü.
National Assessment & Accreditation Council ajanga iba college grade tajung ngutettsü asoshi renemshiba mapang lir, ta pai-sa ashi.
Iba sentong ya Asst. Professor, Tumben Ngullie-i ani aser Asst. Prof. Imtinaro Amri-i sarasadema tenzük. OCKSU general secretary, Kuzoto Shijo-i ‘welcome address’ agütsü.
Iba sentong nung BA 5th Semester, Sabitri aser medemer temi temeja ken aden. College-i taküm tasen arur tenüng nung Neivotsonuo Mezhü-i jembi aser Asst. Prof. Gwasole Tep-i sarasadema iba sentong tembang.