OROP atema nangzükba ama inyakogo: Modi

New Delhi, October 30 (Agencies): Deobarnü Sumdoh, Kinnaur district, Himachal Pradesh nung sepaitem den külemi Diwali benjung amongdang Ato kilonser, Narendra Modi-i, One Rank One Pension scheme (OROP) atema Centre sorkari mezüng installment sen crore 5,500 jungnüa agütsüogo, ta metetdaktsü.
Ato kilonserisa, “Ni Ato kilonser candidate asüdang ni OROP atema nangzük, aser tia makai iba mapang nung sorkar tashi nung alirtemibo iba dangji kechi ajar’ar memeteti liasü,” ta ashi.
One Rank One Pension ya Indian armed forces-i mapang talangka nungi khanga aruba takhangba ka lir. OROP tetezü kasa rank nung anisüngzüker sepaitem, mapa kasa tenzüker anisüngzükogo, parnok data mesüra anizüngzükba küm mapii kasa pension agütsütsü.
Modi-i ashiba agi, “OROP ya sen crore 200 mesüra crore 500 indang masü, saka sen crore 10,000 indang lir. Ni Ato kilonser akumba sülen ni iba atema inyaktsü ta telemtetba agi. Sorkari ibaji khen nung ajak agütsütsü makok, ibayongji ni ex-servicemen dang ibai shilem (instalments) pezü lemsar agitsü mepishiogo.”
“Iba senji shilem pezü nung parnok ket atongtsü. Mezüngbuba shilem atema sen crore 5,500 jungnüa agütsüogo,” ta paisa metetdaktsü.