OROP: Ex serviceman tem maneni lungkak aittsü

New Delhi, September 06 (Agencies): Tanü Ato kilonser Narendra Modi-i, One Rank-One Pension (OROP) ajanga anojungi mapa nungi anisüngzükertema tajangzük angutsü ta sangdongba sülen tanü lungkak aitba sentong anenogo, ajisüaka parnoki akhangba ajakji mataloktsü tashi ano maneni lungkak aittsü ta shiogo.
OROP ajanga anojungi mapa nungi anisüngzükertema tajangzük angutsü ta Ato kilonseri jangjashitsübaji pela agizüker, ajisüaka küm pongu shia nungang pension reprangshitsü ta yashi sangdongbaji tagizüktetla masü, ta lungkak aitertem lenir aser taoba mapang Major General (Retd) Satbir Singh-i ashi.
Singh-isa, sorkari magizüki aliba onüktem nung telangzüba tajung ka magütsüra ex-serviceman temi maneni masü tashi lumia lungkak aittsü, ta metetdaktsü.
Sorkar senpong nungi sen crore 10,000 nungi crore 12,000 tsüngda arrears agütsütsü, aser ibaji telemsa pezü nung agütsütsü, ajisüaka rara nung asürtem kinüngtsü densema amitsürtem nembo khen nungdang ajak agütsütsü, ta sorkari sangdongogo.
OROP scheme ajanga sepai nungi anisüngzüker alir nisung lakh 26 jungnüa aser rara mapang asür kinüngtsür amitsür lakh trok jungnüa tajangzük angutsü.