OROP onük nung Centre aitsüba magizüktetter: Rijiju

New Delhi, November 05 (Agencies): One Rank One Pension (OROP) scheme onük nung opposition party temi Centre aitsüba atema tanü Union Minister of State for Home, Kiren Rijiju-i democracy inyakyim nung tasüngdangba akaba jibo tim dang, ajisüaka Centre nem tai tongloktsübajibo tagizüktetla masü, ta ashi.
Osangbenertem den jembidang Rijiju-i, “Bushisüngdangtsü atema Police inyakyim lir, aser parnok (police) mapa koma inyaktsüla, ibaji minister temi tuyutsü makok. Asenoki iba onük ya tebenjaba mekümdaktsütsüla. Ex-serviceman ka soseta asübaji tia maka tatalokba ka lir,” ta ashi.
“Nisung kar süra ibaji tejashitsüka lir, aser yimtenren onük ka kümdaktsütsü atema  telatetba ka lir. Onük ajakji yimtenren onük mekümtet aser tatalokba ajak nung vote tajangzük atema merangloktsüla. Sepai ka mesüra sensaker ka süra, ibaji tejashitsüka lir, ajisüaka OROP mapa küma meinyakba atema Centre nem tai tongloktsübaji tim masü,” ta minister-isa shisem.
OROP scheme atema meinyakba atema longkak aittsü asoshi sepai nungi anisüngzüker alir, Grewal linük yimtiba Delhi-i arua liasü.
Arishi küm 69, Grewal den külem sepai nungi anisüngzüker alir pezü-i temepishiba shidi ka agütsütsü atema Defence Minister, Manohar Parrikar atadang pai miim achiba ajanga asüba sülen opposition party temi Centre aitsüdar.