OROP sangdong ajanga temelung masür: Ex-servicemen

New Delhi, September 05 (Agencies): Honibar nü New Delhi nung OROP atema lungkak aiter ex-serviceman temi, sorkari One Rank, One Pension (OROP) scheme sangdongba ajanga parnok kangabo temelung masür, kechiyong parnoki akhangba ajakbo sorkari mataloktsü, ta shiogo.

Tanü Union Defence Minister Manohar Parrikar-i OROP scheme sangdongba sülen mapang tatsüka tsüngda New Delhi, Jantar Mandar nung osangbenertem den jembidang OROP atema lungkak aiter lenir aser Retired, Maj. Gen. Satbir Singh-i, “Sorkari OROP benokbaji onoki pelaa agizüker, ajisüaka ex-servicemen temi akhangba onük trokbo parnoki magizük,” ta ashi.

Tarutsü nung maneni lungkak aittsü atema taonung senden ka mena lemtettsü, ta paisa ashi.

“Defence minister-i voluntary retire asür sepaitem nembo OROP tajangzük magütsütsü ta shiogo. Parnok nem iba tajangzük ya magütsüra ibaji ajanga onok defence force nung sepai aika kongshitsü, kechiyong shilem 40 dak tema servicemen temi anojungi voluntary retire asür,” ta paisa ashi.

“Onoki pa dang jangja jangja, nai committee ka tentetra, ibaji züngsem  pongui akümba committee ka asütsüla, iba nungji züngsem asem ex-servicemen tem aser defence services nung züngsem ka aser züngsem pongububaji Central sorkari shimtsüla ta shiogo,” ta paisa shisem.

You must be logged in to post a comment Login