OROP tenangzükba ataloktsüogo: Parrikar

Vellore (Tamil Nadu), November 13 (Agencies): Centre sorkari One Rank One Pension (OROP) mataloktsü, ta army nungi anisüngzüker alirtemi lungkak sashia aitba mapang tanü Union Defence Minister, Manohar Parrikar-i, iba scheme nung tenangzükba ataloktsüogo, ta metetdaktsü.
Vellore nung osangbenertem den jembidang Defence minister-i, “OROP ya election mapang nung BJP tenangzükba ka lir aser ibaji ataloktsür ama ni bilemer. ESAs 300 den o lemteper sangdong agütsüogo. Koshiary Committee indang Para 6.4 ajanga, küm pongu shia pay reprangshitsü temepishibaji tagizüktettsü temepishiba ka lir ta ashir,” ta ashi.
“Lungkak aitertem atema OROP temetetdaktsüba nung onük kar danga anünga lira, parnoki Judicial Commission dangi aotsü akok,” ta Parrikar-i ashi.
Defence Minister-isa, rara nung shilem agir taoba mapang sepaitemi parnoki anguba ‘medal’ arongtsü merangbaji akhümtsübu maliba mapa ka lir, ta aitsü.
“Medal arongba mesüra service medal dang akhümtsübu mesayubaji linük aser Defence service naprongla atema majung,” ta paisa shisem.