Osaka o Daria na final aser Milos o Porto na semi-final asayatsü

Indian Wells, Metsüremi 17 (Agencies): Rogonü (Friday) Indian Wells asayamung tetsür semi final asaya nung Japan tsür Naomi Osaka-i world no. 1 nung alila Romania tsür Simona Halep madak takok ngua final tongtetogo. Iba final asaya nung Osaka Russia tsür Daria Kasatkina den asayatsü jangjaogo.
Iba asaya nung world No. 44 nung alila Osaka-i Halep madak 6-3, 6-0 agi takok angu. Osaka aser Halep na tsüngda asaya minute 64 nung tembang.
Kasa asayamung tetsür semi final asaya tanga ka nung Russia tsür Kasatkina-i ‘Grand Slam’ tenetben koker alila arishi küm 37 tain America tsür Venus Williams den set asem asaya nung 4-6, 6-4, 7-5 agi takok ngutetogo.
“Ni renema meliasü. Iba asaya nung ni ball dak junga mezükshi aser kanga aibelena asaya liasü. Ni bilemba ama masayatet saka lai (Osaka) kanga junga asayaogo,” ta Halep-i ashi
2005 Indian Wells nung Kim Clijsters-i semi-final tongtetba sülenbo iba asayamung semi-final tongteter rongnung Osaka ya jenjang tekübokba nung lir.
Kasa mapang nung Kasatkina-i top-10 jenjang nung alir asayar asem tashi atonga kokteta Indian Wells final mezüngbuba tongtetogo. Kasatkina-i tang tashi asaya aruba rongnung takok tulutibaji world no.8 nung alila Venus madak takok anguba ya asütsü.
Venus den asaya nung Kasatkina-i ace ka, ‘double fault’ pungo aser Venus indang serve tenetben break süa liasü.
Amungnü (Sunday) iba asayamung tetsür final Naomi Osaka aser Daria Kasatkina tsüngda asayatsü.
Kasa asayamung tebur kija asaya nung Canada nunger Milos Raonic-i quarter final asaya koker Argentina nunger Juan Martin Del Potro den semi-final asayatsü jangjaogo.
Quarter-final asaya nung arishi küm 27 tain Milos-i America nunger Sam Querry madak 7-5, 2-6, 6-3 agi takok nguogo. Iba takok dena Milos-i iba season nung tang agi asaya pezübenbuba kokogo kokogo aser ATP Tour title tukububa angutsü asoshi meranga asayadar.
Kasa quarter-final asaya tanga ka nung Argentina nunger Del Porto-i Germany nunger Philipp Kohlschreiber madak 3-6, 6-3, 6-4 agi takok nguogo. Amungnü (Sunday) Milos aser world no. 8 Porto na semi-final asayatsü.
2016 küm kasa asayamung nung Milos final asaya nung tamakok angu. Taoba season asem tashi nung pia iba asayamung semi-final tongtetogo.
Taoba küm Milos yirua surgery agitsüsa akümba ajanga Indian Wells asayamung nung pai shilem magitettsüsa aküm.
“Wimbledon asaya sülen kü indang tekanük surgery agitsüsa akum. Meyi piyong ni asayamung ishika nung shilem agitsü merangdang saka timtem aliba ajanga ni masayatet,” ta Milos-i ashi.