Osama Bin Laden aputsüba yaritepba doctor ka Pakistan-i mechioktsü

Islamabad, January 18 (Agencies) : CIA-i al Qaeda tanishir Osama bin Laden apuba mapa nung yaritep ta temulung melemi bilemba Pakistan nunger doctor ka tepuokdak nungi mechioktsü aser United States ket nema magütsütsü, ta Pakistan law minister-i ashi.
US ketdangsertemi Dr. Shakil Afridi ya hero ka ama züngshir. May 2011 nung US sepaitemi bin Laden tepsetba sülen Dr. Shakil pur tepuokdak ayu.
US Central Intelligence Agency (CIA)-i bin Laden indang DNA samples jangjatsü atema Dr. Shakil-i taila vaccination campaign agi ta Pakistan-i tai tongloktsür.
US sepaitemi bin Laden tepsetba sülen ketdangsertemi pa apu aser pa Islamists den tesentaktep lir ta aitsü.
“Dr. Shakil Afridi-i ozüng alema aser asen linük taginüba anema inyak. Pakistan sorkari United States dang Afridi-i ozü ozüng raksa ta shijen shia arur” ta Law Minister, Zahid Hamid-i ashi.
2012 nung Afridi ya Lashkar-e-Islam züngsem ka aija küm 22 tepuokdak ayutsü oshidang agütsü. Ajisüaka, iba onükji 2013 küm meyipa agi saka nisung tepsetba onük ka nung pa tai tonglokja tepuokdak maneni ayu. Küm 8 tejaklen shiranger ka asüba tatalokba nung ajemdaker pa aitsü.
Pakistan kübok Abbottabad jila nung US-i bin Laden amakba atema Pakistan nunger aika jashi.
Abbottabad nung mapang talangka bin Laden alibaji security maparen nung tashimeiti inyakba ka liasü ta Pakistan ketdangsertemi ashi.
Pakistan-i minute ana tsüngda Afridi chiokdaktsütsü ta yaküm May ita US President-elect Donald Trump-i jembiba o Pakistan foreign ministry-i kanga sashia aija liasü.
September 11, 2001 nü United States amakba sülen nungi Pakistan-ia US-i kiralongraba anema raraba nung aden.
Ajisüaka, Pakistanji temulung melemtetba teyariteper ka ta US ketdangsertemi ashi.
Pakistan-i Afghan Taliban lenirtem jenokdaktsür ta US-i aitsü aser parnokisa Pakistan dang Afghanistan den arrtsüa aliba tesemtem nung kiralongrar teloktem anema mapa inyaktsü takhangba agüja liasü.