Osama bin Laden’er jabasoi tebu mangyangtsü sentong lir

Lahore, May 13 (Agencies): Abbottabad amakba mapang Osama Bin Laden indang kuli kaket balala ngutetba ajanga par chir Hamza Bin Laden-i tebu tsüngsü nung anidaka tebu mangayangtsü akok, ta taoba mapang FBI agent Ali Soufan-i television news channel ka den sensaksemba mapang ashi. Ali Soufan-i Osama indang kuli kakettem jangjaa meteta lir.
“Hamza-i Al Qaeda lokti tuluba aser tashitaitba ka anitettsü,” ta 2001 September 11 nü kiralongrartemi US amakba dak sendakba nung Federal Bureau of Investigation-i bushisüngdangba nung lenir Ali Soufan-i CBS den sensaksemba mapang ashi.
Abbottabad amakba mapang Hamza-i tebu dangi züluba shidi ngutetba ka nung zülua aliba Soufan-i yamai rasaa ashi. “Pai tebu dang ashiba agi, pai pa menerema reprangba aser pai ashiba otem ajak bilemteter.”
Hamza ya tangbo arishi küm 28 shi asütsü aser pai iba shidi pa küm 22 asüdang zülu. “Ni ni merang agi tsüngtetba ama bilemer. Tsüngrem tenüng nung ‘jihad’ lemang nung jajatsü asoshi asenok alir,” ta Hamza-isa shidi nung zülurtsür liasü.
“Hamza ya joko arishi küm 28 jungogo aser pa dak ‘jihadist movement’ longjemshitsüba aser asentenshitsü asoshi tangar puatettsüsa lenir ka sempet lir,” ta taoba mapang FBI agent-i ashi. Pai Laden aser par chir na yimya aika nung kanga mesüktepa aliba ajitet.
Pai taoba küm ana tsüngda nung audio osang ana agütsüogo aser iba nung pai tebu Osama-i amshiba oren aser ‘terminology’ kasa dang amshia iba osang agütsü. FBI agent-isa ashiba agi, US-i Hamza ya kiralongrartem tebendang nung tebu den jenjang kasa nung züngshir.
“America nungertem onok arudar aser nenoki aji metettsü. Onoki kübu atema mang ayangtsü,” ta pai ashi.