Osang adokba nokdangba

Ken bilemdangang, alima nung osangkaket ya madok nungbo koma süla ? Mesüra osangkaket adokyonga, yimteni mesüra sepaitemi mesüra telongpurtemi mulungba osang dang adok nunga koma süla ? Tanübo asen lima nung osangkakettem talubo adoker aser idakji tadoknütsü ajak adoker. Osangkaket nung osang ka adoktsü asoshi shinga nungia temelaba menüngdaker. Aji oda, osang kaket ka nung yimozülurji yiar aser tamachi masü saka nüchi aser tekolok agi kanga junga mapa inyakba nisung lir, anungji pai mesüra lai mulungi kechi shitaka ta bilemer ibaji zülur aser kechi meshitaka ta bilemer, aji mezülur. Alima nung shitakba senso temeten amshia kecha tetsükdak aser talenba melii pei lima aser nübortem asoshi jembiba aser zülubaji nüchiso anguba yimyatem rongnung tongtibangtiba ka lir. Ajisüaka, Naga lima ama yimten tebilemtsü alidak aiben osangtsüsang metetdaktsübaren nung tenokdangba ajurur. Aiben, yimteni mesüra telok kari ajibo tadoktsü mesüra ajibo adokjang ta osangkaket nung inyaker yimozülur aser osangbenertem amokmerenba otsü lir. Aji oda, tanga Assam Rifles purtemi Nagaland nung adokba osangkakettem nung NSCN-K purtemi tangar amokmerena metetdaktsüba aser saru indang osang madoktsütsüla ta ozüng ama agüja lir. Parnoki ashiba agi, NSCN-K telokji India sorkari ozüngi memelaba telok ta metetdakja lir, anungji parnoki tangar amokmerenba osang adoktsübaji parnok yarir asütsü. Aji oda, yimozülurtemi NSCN-K osang adoktsüra ibaji ozüng raksar asütsü, anungji temerenshi angutsü ta Assam Rifles purtemi yimozülurtem amokmerena lir. Ibaji tarendaktsüka aser tetsübutsüka. Ajisüaka, aji tsübua Assam Rifles purtemi mulungba dang adoktsü ta asünungbo osangkaket madokang tajungba asütsü. Osangkakettem nung kechi adoktsü aser kechi madoktsü, iba inyakyimji yimozülurtem nem Assam Rifles purtemi agütsütsü makok. Aji oda, NSCN mesüra NNC-ia mesüra shinga telokia osangkaket nung kechi adoktsüla aser kechibo madoktsüla, ibaji ashitsü makok. Ibaji yimozülur mulung . Yimozülurtemi alima aser nübortem asoshi kechi adoktsüla aser kechi madoktsüla, ibaji meteta lir, anungji ajaki parnok dak temulung alemtsüla. Atangji, yimozülurtemia parnok dak ajaki temulung lemtettsüsa zülutsüla aser alitsüla. Iba jagi dang alima nung yimten aser lokti len shitak ania aotsü. Osangkaket ya kaket dangbo masü mesüra tatalokbatem metetdaktsütsü kija bilemer adokba kaket ka masü. Osangkaket shiaji pei nübortem nem metetdaktsünüba aser angatetdaktsünüba tejangraba nung adoker. Aji oda, kari osangkaket sadema mienyakdaktsüi sotra, ibajibo nübortem nem tim tagütsütsü shilem ka magütsüi sota ayur asütsü, anungji ibajiang nübortem temeten anema inyakba ozüng raksaba mapa ka asütsü. Tanü lima yabo kar tsübua ola madoktet aliba putu masü saka alima ajak ya pei lima kümer shisatsü tesadem agi pei inyaknütsü inyaktsü, pei jembinütsü jembitsü aser pei zülunütsü zülutsüba putu lir. Ibajiang shitakba nüjiso anguba taküm asütsü. Iba temetenji osangkakettem ajanga teimba inyaktetter. Osang kaket adokba ajanga nübortem tajangzük anguba aika lir. Item rongnung tatalokba osangtsüsang metetba dang masü saka lokti aser yimten nung akokba tashi tajung aser majung inyakba ajak puteta temai jungkai adoktsütsü meranger. Iba jagi tajung inyakertemi tajungba inyaktsü meranger aser majung inyakertemi tamajung meinyaktsü meranger. Ano, osangkaket adokba ajanga nübortem maongka angubaji pei bilemba tezüluba nung yimjak nung ajak den lemsateptetter. Aji oda, osangkaket ajanga tenüng sangteper aser ano taitsüa aitsüteper. Item ajakji kin ka yangluba nung shilem tongtibang ka lir. Ano, osangkakettem nung osangbenertemi bushisüngdanga orr yimten aser lokti nung ochimashi mapa inyakba indang jungkai adoktsür, iba jagi ochimashi anema raraba tongpang nung osangkakettemi shilem tuluka agir. Aji oda, shinga tsütsü atsünga masü saka kechi shitak aser kechi ochi aji jembitsü aser zülutsübaji osangkakettem nükjidong lir. Iba nükjidong yur Nagaland nung osangkakettem ajak shinga küboka masü, shinga tsübua masü aser shinga tsütsüa tejak shija masü saka kechi ochi, aji ayimtsü.