Osang prokba ya yimten tashi alir nem mamshidaktsütsüla

Dimapur, May 17 (TYO) : Osang adoker aser osangbenertemi parnokji yimten nung tashi alirtem nem mamshidaktsütsüla, kechiyong osang abenbaji shinga jak repranga masü saka kechi ochi aser shitak, ibaji sangdongtsüla ta Morung Express yimozülur Dr.Aküm Longcharii metetdaktsü.
Osangtsüsang abenba mapa ya government aser nübortem na tsüngda shinga tsütsüa atsünga masü saka kechi shitak aser ochi, ibaji metetdaktsütsü merangtsüla ta Dr.Longchari-isa metetdaktsü.
Pai iba o ya tanü Capital Convention Center, Kohima nung Information and Public Relations (DIPR) department ajanga ayongzükba shisalemsatepba sentong ka nung jembidang metetdaktsü. Iba sentong nung tanü tensa osangtsüsang abenba maparen nung tebenja aser tebilemtsütem indang shisalemsatepa liasü.
Paisa ashiba agi, osangbenrtemi sentong ka nung adenba osang agütsüdang, yangji tongti tesemdanger aser tongti o jembirtemi ashibaji dang masü saka nübortem asoshi nüngdakba mapatema repranga zülutsüla.
Paisa state nung osangbenertem mapa nung tajungba kümdaktsütsü asoshi inyaktsü bilembaji junger aser timtem mapang nung osangbenertem kümzüktsüsa osang adoker aser yimozülurtemi inyaktsüla ta metetdaktsü.
Osangtsüsang prokba ajanga loktiliba nung temelenshi tulu bener arutsüsa tashi alinungji, osangbenertemi temaba jenjang nung alirtem indang dang masü saka tsünglanglen alir nübortem tia indanga tonga oagi osangtsüsang abentsüla ta Longchari-isa metetdaktsü.
Kasa sentong nung Imphal Free Press nung yimozülur, Pradip Phanjoubam-i jembidang, osangtsüsang prokba mapa medeni democracy shitak mapa küma meinyaktettsü ta metetdaktsü.
Osang renema agütsüba maparen indang jembidang, osangtsüsang abenba mapaji tatalokbatem ajak shitak jungjunga bendena tezüngnütsüka zülur agütsütsüla, ta pai-isa metetdaktsü
Osang zülu dang tazüngertem tenük puatsüsa osang indang tenüng (headlines) aser tetenzükbaji kanga junga zülutsüla aser osang abendang shiba, kong, kodang, kechiba aser komaser ta asüba mamai itemji bilemdanga aser asüngdangtepa zülutsüla ta paisa ashi.
Osangbener kaji pei mapa nung kibur küma inyaktettsü asoshi kechi osang agütsüdir, iba maparen indangji jungjunga meteta alitsüla ta paisa ashi. Itemji election indang asütsüa akok mesüra war mesüra sports indang asütsüa akok, kechi mapa südir süaka osangbener kati iba mapa indangji meteta alitsüla, iba jjagiang tatalokba osang otsü kümer züludang tongtibang otsü mezüdoki zülutettsüla ta Phanjoubam-i metetdaktsü.
Paisa sen agütsür osang züludaktsüba indang aser osang abendang shinga tsütsüsa tejak meshii osang shitak abentsü nüngdakba indang shisalemsatepa liasü.
Iba sentong nungsa shisalen teyur IPR nung Joinint Director, Dzüvinuo Theünuoi government aser nübortem na tesendaktep indang jembia liasü. Laisa osangbenertem taküm ochishia shitak aser tazüokba kübok alitsü nüngdakba indang ashidang, osangbenertemji peisasa pei khuret metetba, ochi aser shitak litetba aser nübortem ajangzükdaktsütsü bilema inyakba nübo kaka asütsüla ta metetdaktsü.
Iba sentong tenzüka IPR Director, Wb.Limawati-i jembidang, Nagaland nung osangbenertem aika kümogo aser aibelenertemi osangbenertem tsübur, kechiyong parnoki osangbenertem dak aliba tashiji meteta lir ta metetdaktsü.
Iba sentong nung Kohima, Dimapur, Mokokchung, Kiphiri, Mon, PRO defense aser IPR nungi osangbenertem dena liasü.