Osang Tajung

Nagaland nung taoba ita People’s Democratic Alliance (PDA) government tasen kümtetter anogo 60 tsüngda district headquaters ajak nung yimti yimdong lenmang tama yanglumatsü ta nangzükba ama inyaktsü ta yakanü PWD kilonser aser Chief engineer nati metetdaktsübaji ajak atema osang tajung asütsü. Atangji, Nagaland nung lenmang yabo junger ta kecha nunga mali, saka district headquaters nung Governor aser Chief minister-i anir Deputy Commissioner-tem anogo shia senzüdak lenmang mejungi aliba tama yanglutsübaji tim. Ibaji ser külenang ano tanüngba lenmangtem yangluyonga aotsü imlar. Koba state südir süaka state government-i nübortem asoshi mapa junga inyaker asü meinyaker ta asüba kuliji tamasa gari lenmangtem agi sayur, kechiyong ibajibo anogo shia ajanga süir aser angur. Aji oda, tanga state-i aodang lenmang tajung ngur temulung pelaa aoer aser memeteti par lima nung lenirtem aser nübortem akümtsübua bilemer. Ajisüaka, kodang asen limai meyipa arudir, Nagaland atong metetmeteta lenmang tamajungi auyi ajak ponga atashia aitdang tezüdangadoker aser lenirtem anema nemnemtsü tenzüker. Küm kabo tejashi marem lanur telok katibo district headquaters kar nungbo yimti yimdong tiyong nung motzü atsünga alidak zütsük ona senzüba aser mo tema yutsüba nguogo. Iba ama nübortemi tejashi sayuba mapang aritepa tapok terara ateper toktsüba sülenbo ano Nagaland nung gari lenmang anepalur kibur mali ama kümadoker. Joko, küm aika lenmang majungba agi sen aika jenjang gari saksaogo aser nisungtema temang nung timtem aser takoksa ajuruogo. Ano, aiben tetsüng ana adenba gari nung senzürtem balaka lenmang lendi nung motzü atsünga aliba ajanga süidang mangu ser long nung tsüker yiruyipongba lendong atalokba nguogo. Iba amaji lenmang majungba ajanga majurutsü lendong aser takoksa aika ajurua maksü tenjir. Anogo shia iba ama timtem aser takoksa ajurubaji government nung alirtemia angur aser ajangshir, saka shingaia hau ta mali gari tajung nung dang mener senzüra ojang ta bilemer amai lenmang masü gari-ang tongtibangba bilemer. Ano, lenirtem dang nungibo nübortemsa takoksaba, saka ola madok timtemang arema lenmang tamajung nung senzür. Ashiko, nübortemia asenok mapa agi lenmang tajung nung senzütsübo malang ta bilemer südi. Aji oda, teyanglutsü purtemi parnok dena timtema jajabaji kecha hau ta mali aser tejajatsü pur nübortemia ola madoki timtemang arema senzür ta asüba nisungtemji nisungbo nisung saka nüchi masü. Ibayongji, asen lima nung lenmang mejungi angudang tangari süngmanga asenok menütsür saka asenokibo kecha balaka akseta mebilemer. Asenok timtemji aji lir. Iba jagi Nagaland merenloktetter. Iba tia nung jagi asenok nüchi küma arutsüla aser asen lima nung gari lenmang ya asenok meyong, asenok lenmang ta angatettsüla. Government-i lenmang yanglutsü sen agütsübaji nübortem meyong sen lir, anungji iba sen jagi mapa shitak inyaktsüla. Ibaji meteta nübortemia pei mapa inyaker ta meteta mapa inyakbatem mita reprangtsüla aser shitak inyakdaktsütsüla. Atangji, mapa inyakertem ajak pei asoshi tajangzük bushir, anungji mapa inyakertema takoksabo mangutsüla. Ajisüaka, long temerang tajung melemmelema lema orr külenang longsang den bitumen jungjunga meyokteper yanglutsü melen, long tanük aser ali madak bitumen tanak agi lembanga yutsüra, iba lenmangjibo yangluli raksatsü aser yamaji raksaba asenoki angur. Lenmangbo tilaba aser black topping-bo tapuba saka senbo teimba endok ta asüba nung nübortem kanga akoksadagi. Tangbo joko terenlok mapa inyakba ajak nübortemi jungjunga repranga shitak inyakdaktsütsüla aser terenlok mapa shitak meinyaktettsüsa timtem kar lira, itemjia nübortemi nokdangtsüla. Nübortemang kibur, anungji kiburi kibur temeten aser khuret meteta inyaktsü tim.