Osangbener anati Trump anema ken o benok

Washington, March 31 (Agencies) : US-i drone tem ajanga amaktsü nükjidong yur inyakba “kill list” nung parnok tenünga dena lir ta bilemer, osangbener anati US Tir Donald Trump aser administration tekolak kar anema okadak ken o benoka lir.
Tesüiba mapang Al Jazeera, Islamabad nung tekolakba Ahmad Zaidan aser nija osangbener Bilal Kareem nati tena tenünga Obama lenisüba mapang “kill list” nung inok aser tang ano Trump-i ozüng alema iba “kill list” nung tena tenüng maneni inoksem ta shia U.S. District Court, Washington nung Brihostibarnü iba ken o benok.
Taoba sorkari iba inyakyim asoshi lateta ayuba kar Trump-i salatsüogo, ta teneti benokba kasa ken o nungji shia lir.
Kareem ya US lisopur aser Syria nungi osang agütsür nisung ka liasü.
Pai, “Tesüiba kümtem tayimtsü agi amakba mapang ni punguben tashi tasü nungi athi,” ta ashi.