Osangbenertem den anogo ka state level workshop agi

Kohima, February 28, 2019: Tanü Hotel Japfu, Kohima nung osangbenertem den anogo ka state level awareness workchop nung Joint Secretary, Power & National Level Master Trainer, Sara S. Jamir-i ‘Media Certification and Monitoring Committee’ indang onük jembiba noksa nung angur.

Kohima, February 28 (TYO): Taruba Lok Sabha election nung ajemdaker tanü Tapi Hall, Hotel Japfu Kohima nung state nung osangbenertem den ‘EVM/VVPAT, Media Certification & Monitoring Committee /Media Matters with Media Official’ indang anogo ka State Level Awareness Workshop agiogo, ta ketdangsertem osang ka ajanga metetdaktsü.
Iba sentong ya Chief Electoral Officer office ajanga ayongzük.
Iba sentong nung jembidang Nagaland Chief Electoral Officer, Abhijit Sinha, IAS-i, election inyakyim aser election ayonga agiba nung osangbenertem (media) atema tongtibang shilem ka lir, ta metetdaktsü.
Paisa Paid News nung lendong keta aliba aser item ama osang indang awareness agutsü.
Joint Secretary, Power & National Level Master Trainer, Sara S. Jamir-i power-point ajanga Paid News indang metetdaktsüdang, “Election mapang nung media ajanga sen amshiba ya kanga bulur aser tawa media junga meinyakbaji election mapang nung tim masüba inyakyim tulu ka lir,” ta metetdaktsü.
Laisa, sen aguja osangtsüsang adokdaktsüba (paid news) ya tang tashi election dak sendakba ozüng alemba aibelen ka masü, ajisüaka iba ya ajanga election junga agitettsü inyakyim nung Election Commission nema tebilemtsü agutsür, ta ashi.
“Item ama osang ajanga nübur nem yazü osang agutsür aser tangatetba tajung magutsüteti voters tangatetba kongshir aser Right to Information-a kongshir,” ta lai ashi.
Sara S. Jamir-isa, sen agutsür osang adokdaktsüba anema inyaktsü atema iba ya election dak sendakba aibelen ka südaktsütsüla, aser ibaji RP Act Act, 1951 yanglushiba ajanga akoktsü, iba aibelen anema sen teindokba ceiling latettsütsüla, yimtenren party tem densema stakeholders den senteper inyaktsüla, democracy anema iba amokmeren atema yimtenren party tem aser osangbenertemi inyaktsüla aser sen agutsür osang adokdaktsüba ajanga takoksatemji nübur nem angatetdaktsütsüla, ta ashi.
Lai ashiba agi, Paid News Monitoring Mechanism temji- Media Certification & Monitoring Committee (MCMC) tentetba, rate card meshiba, media nem angatetdaktsüba, media aser yimtenren party tem den workshops aser training ayonga katsüba densema lir.
Election Commission-i district aser state level nung Media Certification & Monitoring Committee tentettsü tuyu aser parnok teinyaktsü tongti mapa asemji- social media densema electronic media nung yimtenren indang advertisement atema jelia certification agutsütsü, sen agutsür osang adokdaktsüba tatalokbatem mita reprangtsü aser election inyakyim nung media nung ozüng alema inyakba mapatem reprangtsü atema lir, ta Sara S Jamir-i shisem.
Election Commission of India nungitertem rongnung tashi taitibaji media lir, Commission-i linük temzüng nung aliba mapatem inyakba nung tenungiter tajung kaji media lir, aser election inyakyim den election ayonga agiba nung media ya Election Commission yarisemer ka lir, ta lai ashi.
Laisa, democracy atema media ya kanga nüngdak, media-i sadoka aser khuret bena meinyakra democracy tashi maittsü, ta ashi.
Kasa sentong nung Assistant Chief Electoral Officer & National Level Master Trainer, R. Mhathung-i osangbenertem dang EVM/VVPAT Administrative Procedures tesayuba aguja liasü.