Osangkaket nung züngshiba ajakbo mamangtsüla: Arpita Khan

October 19, 2015: India aser Romania linük naprongla nung Bollywood nung nüngtugu actor Salman Khan aser Romania tsür Iulia Vantur na kibong akumtsü atema aniasüngtepogo ta olulu jembiba dak senatakba nung Salman Khan teno Arpita Khan-i, angashiba ajakbo mamangtsüla, ta ashi.
‘Bajrangi Bhaijaan’ film actor Salman tedong ta olulu jembia alila Iulia Vantur lar linük Romania-i oa lir aser yangjia la Salman den aniasüngtepogo, ta olulu jembidar.
Iba dak sentakba nung Arpita-i twitter ajanga, “Osangkakettem mesüra websites balala nung nai züngshiba ajakbo mamangtsüla. Item nisungtem yagi nüngdak makaba osang kechisa prokshir,” ta ashi.
Salman Khan teno Arpita Khan Sharma kiyimba benjung nung pai Romania tsür, Iulia Vantur metetpelatepdaktsüba sülen nungi tena meimteper, ta olulu jembitsü tenzüka liasü.
Jagran.com osang ka ajanga ashiba agi, Salman aser Iulia na kuri (ring) melentepogo aser sangküm kibong akümtsü imlar. Iulia temeyong nung kuri ka enoker nguogo.
Ajisüaka tang tashi nung Salman mesüra Iulia napronglai iba idang kecha jembia mesüra sangdonga mali.
Taoba mapangtem nung Bollywood nung asangur tain Salman-i Katrina Kaif, Aishwarya Rai aser Sangeeta Bijlani nunger den meimtepa aruogo.