Osangkaketem amshiba nungibo tashidak memenar

Dimapur, March 28 (TYO) : Nisungtem rongnung tashidak mesen menatepa aoba indang bushidanger scientist-temi, osangkaket menüngba kakettem amshiba nungibo Coronavirus tashidak mesen menatepa aoba tang tashibo kecha puteta mali ta metetdaktsüogo.
Kaket amer azüngba ajangabo coronavirus ama tashidak menatepa aoba kuli kecha nguteta maka, osangkaket menüngba kakettem ama nung tashidak mesen taküm melitetter ta linük nung nüngtugu medical doctortemi kuli agütsüogo.
Indian Council of Medical Research (ICMR) nung Chief epidemiologist, Nivedita Gupta-i ashiba agi, Coronavirus tashidak ya tango sashiba nung timtem agütsüba tashidak ka lir, aser iba tashidak ya osangkaket aser kechisarina aleper aruba kakettem ajanga menatepba kulibo mali, anungji kecha lendong mali. ICMR telok nem ya Coronavirus tashidak mesen menatepa aoba maparen bushidanga zülua ayutsü mapa nunglokja lir.
National Centre for Disease Control (NCDC) nung director Dr. Surjeet K Singh-i ashiba agia, coronavirus tashidak mesen yabo osangkakettem amshiba ajangabo memenateptsü saka hajidang aser aketdang aluba metsü aser neptsüjang aser yin aser plastic amala nung mesen tema aliba ajanga menar, anungji osangkakettem amshiba nungbo lendong mali.
Coronavirus tashidak mesen ya osangkakettem amshiba nungia dena menatepa aoer ta olulu tapu tapu jembiba agi, iba ama peisasa tsübua bilemba agi jembiba oluluji jangjashitsütsü asoshi alima nung tashidak mesen indang bushidanger health expert-temi iba osang ya metetdaktsü.