Osangkakettem dak aketba tashi

Nagaland nung election timi merüka agitsü asoshi merangba sentongtem pu sema Nagaland nung adokba osangkaket tenet nungi yimozülurtem longjemer yimjak nung ken o takang metetdaktsüba jagi Nagaland nung election timi agitsüba ya kanga rongdak nüngdak mapa ka kümogo ta nübortem ajungmesua metetdaktsür asütsü. Atangji, yimozülurtemi metetdaktsüba ama, tang nungi election ozüng anema telemtetba agibatem osangkaket nung madoktsütsü. Ajisüaka, iba nükjidong tongteta inyaktsübajibo nübortem asütsü. Osangkaket nung election ozüng anema putu menden mesüra telok kari candidate ka dang yaritsü asoshi lemtetba telemtetbatem madoktsütsü lemtetba nükjidongji yamaji shinga putu menden nunga melemtetdaktsüner, anungji yamaji melemteti vote agütsütsü temeten alir senso shiai pei vote enoktsütettsüsa yimten aser telok ajak dak tangatetba alitsüla. Taoba election-tem nung yimtsüng aika nung putu menden mesüra senso mongdangi candidate ka dang yimer ajaki mulunga yaritsü lemteter ta lemtetli, aji osangkaket nung sangdongli aser vote agütsüba anogo nung ajak tenüng nung nisung asem pezü kati dang vote enoktsüli ta aruogo. Atangji, senso ajaki mulunga pa yaritsü lemtet ta yimteni mesüra mongdangi lemtetbaji tim amai saka jungjunga reprangdangra senso candidate shimtsü atema telemtetba magidang to kasa yimer aser kinunger karbo tazük kanga mejungi chir mozü kidang mongdar asütsü aser ano karbo yimtak nungi aridoktsü mesüra ano karbo senso nungi tejendoka jendoktsü. Item ajakji election ozüng anema telemtetba agiba nungi tenzükba tebilemtsütem lir. Election nung ya küm agidang abensara aser tejangja senso ka süra tokteptsü akok mesüra vote-a agütsütsü akok. Ajisüaka, putu menden mesüra senso mongdangi shimba candidate nem vote agütsütsü memulungra parnokjibo ki shibanga yutsür aser vote enoktsüia marudaktsür. Ano, yimteni shimba candidate dak alaka kari danga yinüra parnokjibo yimtak nungia aridoker. Iba amaji electioni inürtem meidaktsü aser vote agütsütsü temsüa alir aika amokmerena vote agütsütsü nokdangba ajanga yimtsüng aika nung lendong timtem ataloker aser election temer külena yimten aser arogo nung nübortem putepa lia moutetter. Talisa,  kanga tim masüba mapa kaji yimtsüng nung Village Council-i election nung yaritsü asoshi candidate shimba ya lir. Village Council ya Village council ozüng agi alena lir, anungji parnoki election atema candidate shimbaji ozüng anema inyakba mapa ka asütsü. Aji oda, yimozülurtem taginüba aser teyongyaba tulutibaji Nagaland nung election agiba anogo nung senso shiai pei vote pei enokdaktsüner aser election-i inürtem tashiyim agi menokdangi odang idaktsütsüla. Nagaland nung kodang election-i inürtem ajak kecha tenokdangba melii idaktsüdir aser senso shiai pei mulungba candidate nem vote agütsütetdir, idangji dang democracy ajanga bener arutsüba nüchiso aser temoatsütem agitettsü. Idangjibo candidate-tem sen endoktsüa nüngdak madoktsü aser yimertem rongnunga kecha tamajung metemtettsü. Aji oda, nisung ajak menüremtepa pei Voter’s ID amer tarensena nokdaker ka khen, ka khen ta miima vote enoktsür adoktsü. Ibaji dang democratic election asütsü. Iba jagi dang shitak  nübortem  asoshi jembitettsü, zülutettsü aser inyaktettsüba nübo shimtettettsü. Joko, asen lima nung election timi magitetba ajanga asen lima shirangba ya anepdaktsüner. Iba jagi kechianga mesayang, tang tesüsa yimozülurtemi “Clean Election” sentong nung inyakertem pusema putu menden aser telok tentettemi candidate mejeteta shimba osang madoktsütsü lemtetogo. Ibai election timi agidaktsünüba mapa nung yaritepba mapa tilaka asütsü. Iba amaji ano Nagaland government nungia Home department aser Election department ajanga putu menden aser nübortem dang senso candidate meshimtsü aser senso shia nem pei vote peii enoktsü menokdangtsüla ta ozüng takang ka metetdaktsütsü kanga nüngdaka kümogo. Item ama maparen nung tashi mangai inyakertemjibo Election Code of Conduct nung aibelener asütsüsa ka Election Commission dena jembitsüsa inyakteptsüla.