Osangtajung abenba oshi

Ao oshi ya alima nung temoatsü aketba jangratemtsü oshi ka lir. Iba oshi yabo nübortem rongnung tsükchitepdaktsütsü mesüra tashiyim amshitsü ajungshiba oshi ka masü saka osangtajung abenba oshi lir. Aji oda, alima shi tsütsü kecha memetet mangsa shiruru ama aliba nübortem  aika Ao oshi ajanga  nisungchi kümdaktsü aser tanüla tsütsüa Yisu Khrista osangtajung mangashidang tesamar aliba Naga nunger aika Ao oshi ajanga osangtajung angshia tekümtet meteta kümogo. Item ajakji Ao oshi ajanga inyakba sayatenya mapatem lir. Iba tashiji asenoki metetra Ao oshi ya asenok ajaki oshi dang nungi taoba sapua akümtsübua amshitsü. Tanü Nagaland nung Naga nunger kin 15 lir aser item kin terpongo rongnung Aor zünga kin tii Ao kanga sapua jembir. Item kintem nungi taintem aser talisa Tsüngrem tenzüker aser sayutsüngirtemibo tanüa Ao o nung adokba Temeshi Laishiba dang amshir. Aji oda tangar kintem asoshia Ao oshi ashibaji tangar dang nungi balaka tashi aitba amai lir. Iba ama osangtajung abenba oshi jembirtemji koda topur tajung aser koda temoatsüba nübortem asütsü ta kanga pelaa bilema Tsüngrem tenüng asangtsü tetemsü. Atangji, mapang kabo iba ama osangtajung abenba oshi ya takidak makaba oshi ama bilema Aortemia dena Ao jembitsü mesapui kümya liasü. Iba jagi, tanü lanurtem aikati Ao oshi mejembitetter. Ibaji parnok tai masü saka tsüraburtemi Ao oshi ya osangtajung abenba aser Tsüngrem ain aketba oshi ta memetet aser mangatetba ajanga lir. Asenok aika class ter ajangra mesüra graduate süra aser tulur kümra, joko Ao oshi jembitsübaji maksü amato bilemdaktsüba mapang ka liasü. Iba jagi asenok tulur aser takar chirtem aika English, Hindi aser Nagamese jembiajembia takidak maka kümogo. Ajisüaka, tanübo tepelatsüka ajaki Ao oshi sapua jembitsü tenzükogo. Aji oda, tepelatsü tulutibaji tang mapang tatsüka tsüngda nung Ao oshi nung züluba kaket tajung aika sayaogo. Ibaji Ao oshi nung asentenshiba tamaitsü lir. Aji oda, Ao oshi ya shitakba osangtajung abenba oshi süra tanü Naga nunger yimten aser lokti tebilemtsütem ya Ao oshi agi akoktsü. Alemli asen tsüraburtemi memetetba lima nung Tsüngremer osangtajung sangdongba hadir tajungtibaji Ao oshi liasü. Aji oda, tanüa Naga yimten tebilemtsü ya Ao oshi agidang koka jembitettsü. Nagaland nung Naga nunger anüdok aser anülulen na tsüngda temulung melemtetba aser meputeptetba timtem kar danga lira, ibajia Ao oshi agidang yimjung o jembia putepdaktsütettsü. Tetezü, Ao oshi jembirtemji Tsüngremi balaka moatsüba aser shimtetba kin lir. Aji oda, tangar kintem atema inyaktsü asoshia Ao oshi jembirtem khuret tuluba lir. Item temoatsü aser khuret ajakji angateta asenoki Ao oshi akümketdakja jembira Nagaland yimjung nung alitsü. Naga nungertem yimten tebilemtsü ya English aser Nagamese agi  dang jembiba agi mangatetba aser tebilemtsü tuluba küma aor. Ajisüaka, Aortemi dang osangtajung abenba Ao oshi agi Naga kintem den yimjung indang jembia shisalemsatepra, Nagaland anüdok aser anülu kecha mali ajak ka küma longjemshitsü. Iba mapang aser anogoji ajaki yongyar. Alemli asen tsüraburtem tzü adena osangtajung bener aodang nüngdakba oset kecha maben saka Ao oshi dang jembia ao. Idakji Tsüngrem aden, anungji Ao o ajanga temenenpurtem mulung meyip aser kaketshisatsü angu. Iba ama kintem atema khuret bentetba oshi, Ao oshiji ano milak ama jangrudaktsütetra, ibaji tanüla milak akümtsü aser ano khen Naga lima meshitettsü. Naga lima nung Ao sapua jembi tashi yimjung liasü saka kodang Aortemi dena Ao oshi mejembinüi aküm, idangji ano azü tokshitsü tenzük. Tang ya Aor kaket ken o adokba aser Ao oshi asentenshiba mapang lir, ashiko ibaji Naga lima yimjung asoshi inyaktsü renemtsür asütsüa akok !