Osangtajung shiyonga aoba

Asenoki ajuruba tensa tia ajak nung asenoki asenoksasa bilemdangtsüsa akümba mapa ana lir. Kaji, iba yagi kü dak koma kongshir, aser ano kaji iba ya ajanga Tsüngrem yimli nung koma inyaker ? Aji oda, alima nung Yisu Khrista temeim osang tajung abener rongnung kechi tia arudir aruaka, tensa tia nem pa mekokdaktsüi, paiang tensa tia kokteta osangtajung sangdongsangjibo tenyar Paul-ang asütsü. Aji oda, pa kechi tia nung lidir liaka, iba tensa mapangji komaser Yisu temeim kulisüba nung endoktsü ta bilemba, reprangdangba aser kuli süba nung Paul-i takok kanga junga ngua inyaktetba asenoki Filipi tapu nung azünger. Pa kodang tepuokdak küm ana tashi liasü, iba mapangjia pai pa asoshi Yisu Khrista temeim osangtajung kuli asütsü mapang tajunga ta reprangtet. Iba tangatetba jagi pa tasü itta aküm aser pai paji tepuoker ka ama masü saka Khrista nung takoker ka ama bilema inyak. Paul taküm nung iba ama tensa tia ajuruba aser pa tamang aser tangatetba indang Filip 1:12 nung, ” adianutem, kü dak kechisa atalok, aji agi osangtajungji taliang ayimsünga aküm ta ni nenok nem metetdaktsüner,” ta jangjajangjaa shia angur. Iba tekong nung shia aliba yabo rasaa mashiyonga asenoki ajaki angatetter. Aji oda, Roman chuba Nero yimli nung Paul tepuokdak ayuba jagiang Paul-i pa anüker sepaitem danga osangtajung shitet aser sepaitem aika temulung meyipa Paul-i amangba Yisu Khristaji parnok taküm nung kibur aser kümtetdakba ta agizük. Iba kasaji kodang teloki Paul aser Sila maksüja süoshi dena shizüktsür tasü küma züker tepuokdak ayu, parnok atemabo iba tensa tiaji Yisu Khrista osang tajung kulisütsü mapang tajungtiba liasü. Iba tensa tia nungji parnoki ken aten aser sarasadema Yisu temeim kuli asüba ajanga tanükertem temulung meyipa asenoki Tenyar Mapa 16 nung tatalokba otsü tejangja shia angur. Tamang nung tasü aitertem atemabo tensa tia ajakji Tsüngrem temeim kuli asütsü mapang tajungtiba ta Paul aser Sila nunger taküm kuli ajanga asenoki angatetter. Iba jagi asenoka tasü aiter. Aji oda, Paul nungertemi tetsübu melii tensa tia ajak nung ajak dang Yisu temeim kuli asüba jagi tangar adianutema parnok amaji metsübui Yisu temeim kuli asütsü tasü itdaktsü ta kasa Filipi tapu 1:14 nung shia angur. Iba amaji asenok Khristan taküm nunga aiben timtem ajurur. Atangji, tanü tashibo asenokbo Paul nungertemi ajuruba tetsübutsü tia aser Khristan yimsü anemertemi reshikangshiba aser tepuokdak ayuba tensa tia tashibo majurui alitsü akok. Ajisüaka, asenoka asen tamang aser mapa yari aiben tensa tia tamajung ajurur. Aseni mounübaleni yoker, meinyaknüba inyakdaktsür, sen tenük masüng agütsür, nüngsen jembitsür, menütsür, nüngdak meperiteter, teyaritsüla aika adoker, taotsüla aiben adoker, aiben temang manemi alir, tangari asenok dak temulung malemer ta asüba tensa tia agi asenok aiben tezüdangdaktsüa akok mesüra mepelai aser tasü meiti kümdaktsütsüa akok. Iba mapang nung asenoki Paul aser Sila taküm otsü bilemtettsüla. Iba jagi asenok Tsüngrem nungi tashi tasen angutsü. Aji oda, tang ama linük nung Khristan anemertem tali bolua akümdang, parnok anema jembitsübaji tetsübutsüka asütsüa akok. Ajisüaka, Khristan yimsü yabo tsübuseta amangba yimsü ka masü saka asenokji ‘takokertem dang nungia taoba'(Rom 8:37) ta amanga Yisu temeim kuli asüba tamangba yimsü lir. Ibaji anogo shia asenok sobaliba südaktsüdi.
[Temetettsü ka – Rom 8:37 nung “asenok ya takokertem dang nungia taoba,” ta aliba oren ya BSI Version Ao Naga C.L. Temeshi Lai nungbo shia mangur! ]