Oscar angula, actress Patty Duke süogo

March 30, 2016 : 1960s mapang nung “The Patty Duke Show” sentong ajanga kanga nüngtugu akümla aser Oscar Award ngua alila America tsür actress Patty Duke Mongulbarnü süogo,” ta la den inyaker kati Reuters osangbenertem dang ashi. La arishi küm 69 liasü.

Duke ya Mongulbar anepdang Coeur d’Alene, Idaho nung asü. La tar pokmar tar nung azü jajaba tezütem nung komasotsü adoka, iba jagi shiranga asü, ta lar otongdar Mitchell Stubbs-i ashi.

“La ya kinüngtsü, tetsü, tettsü, tembar tajung ka, tekolok meshidakertem atema advocate aser sobaliba meimer nisung ka liasü,” ta Stubbs-i ashi.

La 1946 küm New York nung aso aser la tenüng Anna Duke ta aja. La tanur asüdang nungi advertisment, television aser sabang balala nung shilem agia intet.

Duke-i arishi küm 16 asüba mapang, tenük agi magur aser tenarong agi mangashirtem kaket zülula aser nüburtem temeten asoshi inyakla Helen Keller taküm otsü nung ajemdaker 1962 küm tangokba “The Miracle Worker” film nung Keller ama shilem kanga junga agitetba ajanga Oscar Award angu. Ano 1979 küm TV movie, “The Miracle Worker” nung lai Keller tesayur Annie Sullivan ama shilem agiba ajanga Emmy award angu.

Tenük aser tenarong agi timtemertem bendanga agüja yarir, Helen Keller teloki Duke asüba angashia temulung mepelateter, ta ashi.

“Lai ‘The Miracle Worker’ film nung kangasa junga shilem agitetba ajanga Helen Keller dak keta aliba sempet tajung temai adokdaktsü aser ibaji ajanga tenük aser tenarong agi timtemertem yaritsü asoshi nüburtem ajungmeso,” ta Helen Keller teloki sangdong ka ajanga metetdaktsü.

Lai 1963 nungi 1966 tashi la indang sentong “The Patty Duke Show” nung tongti shilem agi aser 1967 küm “Valley of the Dolls” film nung shilem agi.

1980s mapang nung la Screen Actor’s Guild nung Tir aküm aser iba den külemi tekolok meshidak pur atema advocate aküm.

Duke akümlidang kibong pezüben tashi aküm aser lar tanur asem lir. “Lord of the Rings” nung shilem agisang Sean Astin aser “The Facts of Life” film nung shilem agisang Mackenzie Astin naprong ya mapang balala nung la kinüngbotem liasü