Oscar sempet atema PricewaterhouseCoopers-isa vote azüngtsü

Hollywood, March 30 (Agencies): Taküm küm 89buba Academy Award sentong nung ‘Best Picture’ sempet agütsüba nung nisungtem mangmangtepdakja liaka PricewaterhouseCooper (PwC) ajanga sa iba mapa inyaktsü, ta iba sentong ayongertemi sangdongogo.
Oscar sempet agütsütsü asoshi vote azüngba nungi tenzüka iba sentong ajunga nung sempet agütsütsü asoshi PwC ajanga achayanga agütsür. PwC ajanga iba mapa ya 1929 küm nungi inyaka aru. Saka tia makatsüka taküm ‘Best Picture’ sempet ya ‘Moonlight’ film nem agütsütsü liasü, saka mangatettep kar ajanga ‘La La Land’ nem agütsü.
“Tarutsü nung iba inyakyim nung kasa aibelen masütsü asoshi inyakyim tasen amshitsü aser tarutsü nung iba sentong agiba sabang tesülen electronic oset mamshitsü,” ta Academy Award nung tir, Cheryl Boone Isaacs-i züngsem dang metetdaktsü.
PwC ajanga iba sempet agütsütsü asoshi vote agütsübatem azüngtsü aser takoker tenüngtem ya envelope nung inoker sempet agütsütsü asoshi sabangi atur nem amoktsür. Saka taküm iba sentong nung ‘Best Picture’ sempet agütsütsü mapang envelope agütsüsang, Brian Cullinan ya Twitter nung noksa inoka amshiba ajanga sabangi atur Warren Beatty aser Faye Dunaway-na nem envelope tai agütsü.