Oscar sempet magütsütang alima nung nisung anati tama meteter

Los Angeles, February 24 (Agencies): Alima ajungai Oscars sempet angur metettsü asoshi Deobar anogo atongtsü kanga yongyar, saka nisung anatibo iba sempet ya shirnokisa angutsüar meteta lir.
Item nisung ana ya film mesüra osangkaket nunga mangur, saka tena ya Oscars nung kanga tongtipangtiba nisung ana lir. Tena tenüngji Martha Ruiz aser Brian Cullinan lir.
Iba sempet agütsütsüpuri sempet agizüktsüpur tenüng memetetdaktsü tashi alima nung Ruiz aser Cullinan nati dang takoker tenüng ya meteta lir. Tenati item vote ya janga junga aser aiben züngshir.
“Ni jangraba mapa inyaktsü asoshi kü dang asüngdang. Iba sentong agitsü aliba tesemi kü gari nung mener aodang, nisung ajaki metetnüa aliba osang nibo meteter alitsü,” ta Ruiz-i ashi.
Ruiz aser Cullinan ya PriceWaterhouseCooper accountancy firm ka nung külemi mapa inyaker aser Mongulbarnü iba sempet agütsütsü asoshi vote agütsüba tembangba sülen, tenati item vote ya azüng tenzük.
Academy of Motion Picture arts & Science nung aliba züngsem 7,000-i Oscar shimtsü asoshi electronic mesüra post ajanga vote agütsür.
Oscar sempet ya telemsa 24 nung tajungtiba shimteta agütsütsü aser item shimtsü asoshi agütsüba vote ajunga ya teka agi azünger.
“Iba sempet asoshi vote agütsüba ya tembangba sülen onoki nüngdakba ajunga menüngzüker aser teka agi azünger. Item osangtem ya system mesüra computer nung ayuba ajanga timtem jenti ajurur, aser iba ajanga onoki teka agi azünger,” ta Ruiz-isa ashi.
Ruiz aser Cullinan nati iba sempet angur tenüng ya jungjunga renemer tenaprongi envelope balala nung inoka ayutsü, saka aji kisüng masü, takoker ajunga tenüngji tenati temolung nung ayutsüla.
Envelope ajak ya PriceWaterhouseCooper indang official seal agi shibangtsü aser memetetba tesem nung rizünga ayutsü.
Iba sempet agütsüba anogo nung sentong agitsüba tesemi aoba mapang nunga Ruiz aser Cullinan naprong lenmang balala nungi aotsü aser LAPD tanükertemi tena anüker.
Oscar atema vote ya PrinceWaterhouseCooper teloki 84 ben buba azünger aser item vote ya alima nung nisung 12 kisüngi dang zünga lir.
89 buba Academy Awards sentong ya Hollywood nung Dolby Theatre nung Deobarnü agitsü lir.