Oscars mapang teka amaba yimya Nicole Kidman-i rasa ashi

March 09, 2017: Hollywood nung nüngtugu actor Nicole Kidman-i la Oscar sentong nung tzüyim nung aliba shiruru ‘seal’ matenba yimya nung teka amabaji kanga dang jenjang tasak kuri (ring) ka ayoker aliba ajanga, ta ashi.
‘Lion’ film nung shilem agila actor ya, social media balala nung, 89buba Academy Award sentong nung la teka amaba yimya ‘seal’ matenba den atishia menütsü.
Lai iba teka amaba yimya ‘Australian radio’ nung Kyle aser Jackie O na den sensaksemba mapang rasaa ashi.
‘Big Little Lies’ nung shilem agilai ashiba agi, la kuri ka ayoker liasü, aser iba ajanga teka mejemtepa amatsü asoshi kanga tasak liasü. “Ni asoshi kanga dang jangramatem mapang ka liasü. Ni teka matennüa liasü, kechiyong ni teka memara tangar ajaki ni kechiba teka mamar ta bilemtsü. Anungji ni teka maten, saka kü temeyong nung kanga dang jenjang tasak indang tangar kuri ka ayoker aliba meraksatsünüba ajanga teka junga mematet,” ta lai ashi.
Kidman-i Oscar sentong nung ‘Armani Prive dress’ ka den külemi Harry Winston indang sentilong 119 karats aser Omega museum diamond anütettsü ka, ta inoker liasü. Lai agiba süoshi aser azük, kuritem ajak senteper million aika alang liasü.
Tanga onük tajung tejembitsü mali ama, la teka amaba yimya atema kanga sashia jembiba atema kanga aoksa bilemer ta Kidman-i shisem.